सर्व सुरक्षित
नागपूर NAGPUR : गडचिरोली-चिमूर लोकसभा क्षेत्राचे खासदार तथा भाजपच्या अनुसूचित जमाती सेलचे राष्ट्रीय महामंत्री ASHOK NETE अशोक नेते शनिवारी नागपूरवरून गडचिरोलीच्या दिशेने येत असताना उमरेड विहिरगावजवळ त्यांच्या गाडीला अपघात झाला. यात गाडीचे बऱ्यापैकी नुकसान झाले असले तरी कोणालाही दुखापत झालेली नाही. आपण सुखरूप असल्याचे खा.अशोक नेते यांनी सांगितले.
खा.नेते मुंबईवरून रात्री १२.१५ च्या सुमारास नागपूरला पोहोचल्यानंतर सकाळी ते आपल्या वाहनाने (एमएच ३३, एए ९९९०) गडचिरोलीकडे निघाले होते. शनिवारी सकाळी १०.२० वाजताच्या सुमारास उमरेड मार्गावरील विहिरगावजवळ समोरच्या ट्रकने अचानक वळण घेतले. त्यामुळे त्या ट्रकला ओव्हरटेक करण्याच्या प्रयत्नात असलेल्या खा.नेते यांच्या वाहनचालकाने गाडीवरील नियंत्रण सुटू न देता तातडीने ब्रेक लावले.मात्र, या प्रयत्नात ट्रकच्या एका कॅार्नरला मागून कारची धडक बसली. खा.नेते यांच्या वाहनाचे थोडे नुकसान झाले. मात्र नेते यांच्यासह त्यांच्या वाहनातील कोणालाही इजा झाली नाही, असे खासदारांचे सोशल मीडिया प्रमुख दिवाकर गेडाम यांनी सांगितले.
यानंतर दुसऱ्या वाहनाने खा.नेते गडचिरोलीकडे निघाले. गडचिरोलीत पोहोचल्यानंतर ते आपल्या मतदार संघातील नियोजित दौऱ्यासाठी रवाना झाले.
