नागपूर :- वीज ग्राहकांना सदैव आधुनिक तंत्रज्ञानाच्या माध्यमातून सेवा पुरविण्यासाठी कटीबद्ध असलेल्या महावितरणने लघु व उच्चदाब ग्राहकांना वीजबिल भरण्यासाठी अनेक सुविधा उपलब्ध करुन दिल्या आहेत. या आधुनिक सुविधांचा वापत करीत महावितरणच्या नागपूर परिमंडलातील तब्बल 53.67 टक्के लघुदाब वीज ग्राहकांनी आणि शंभर टक्के उच्चदाब ग्राहकांनी ऑनलाईन वीजबिल भरण्यास पसंती दिली आहे. विशेष म्हणजे जून महिन्याच्या तुलनेत हे प्रमाण तब्बल 8 टक्क्यांपेक्षा अधिक आहे. मागील काही वर्षात ऑनलाईन वीजबिल भरणा-या ग्राहकांची संख्या दिवसेंदिवस वाढत आहे. ऑक्टोबर महिन्यात नागपूर परिमंडलातील 7 लाख 86 हजार 962 ग्राहकांनी 207 कोटींपेक्षा अधिकचा म्हणजेच 63.15 टक्के रकमेच्या वीजबिलांचा भरणा घरबसल्या आणि सुरक्षितपणे ऑनलाईन पद्धतीने केला आहे.
महावितरणने आपल्या ग्राहकांसाठी संकेतस्थळासोबतच, महावितरण मोबाईल ॲप, पेमेंट वॉलेट आणि इतरही ऑनलाईन सेवांच्या माध्यमातून वीजबिलांचा भरणा करण्यासाठी सुविधा उपलब्ध करून दिली आहे. तासनतास रांगेत उभे न राहता अवघ्या काही मिनिटांत वीजबिलांचा भरणा करता येणे शक्य झाले आहे. याशिवाय वीज बिलाचा एसएमएस येताच त्याच लिंकवरून वीजबिल भरण्याची सुविधा असल्याने वेळीच बिलांचा भरणा केल्यामुळे ग्राहकांना विलंब आकाराचा भुर्दंडही भरावा लागत नाही.अनेक ग्राहक वेळीच बील भरणा करून बिलाच्या रकमेत मिळणारी सवलतही मिळवित आहेत.
नागपूर परिमंडलांतर्गत असलेल्या नागपूर ग्रामीण मंडलातील 1 लाख 57 हजार 77 ग्राहकांनी म्हणजेच 46.01 टक्के ग्राहकांनी 36.23 कोटी रुपये म्हणजेच 59.84 टक्के रकमेचा बिल भरणा ऑनलाईन पद्धतीने केला आहे. नागपूर शहर मंडलातील 5 लाख 5 हजार 323 म्हणजेच 60.31 टक्के ग्राहकांनी 148.58 कोटींचा म्हणजेच 65.89 टक्के रकमेचा ऑनलाईन बील भरणा केला आहे याशिवाय वर्धा मंडलातील 1 लाख 24 हजार 562 म्हणजेच 43.43 टक्के ग्राहकांनी 22 कोटी 84 लाख म्हणजेच 53.41 टक्के रकमेचा ऑनलाईन बिल भरणा केला आहे. शनिवार, रविवार व सुटीच्या दिवशी देखील वीज भरणा केंद्र सुरु राहणार आहेत. दरम्यान, शाळा आणि महाविद्यालयांसोबतच कार्यालयांना असलेली सलग सुट्टी बघता अनेकजण बाहेर फ़िरायला जाण्याचे नियोजन करतात पण थकबाकीपोटी वीजपुरवठा खंडित होण्याची कारवाई शक्य असल्याने ऑनलाईन पद्धतीने कधीही आणि कुठुनही वीजबिलांचा भरणा करुन वीजपुरवठा खंडित होण्याची कारवाई टाळण्याचे आवाहन महावितरणतर्फ़े करण्यात आले आहे.
