शेगाव : अपघातात तिघांचा मृत्यू, 7 जखमी

शेगाव, 22 मे  : चालकाचे वाहनावरील नियंत्रण सुटल्यामुळे पिल्लरला धडक लागून झालेल्या अपघातात 3 जणांचा मृत्यू झाल्याची घटना शेगाव येथे घडली. हा अपघात सोमवारी सकाळी 6 वाजेच्या सुमाराला घडला. अपघाताला बळी पडलेले सर्वजण पंढरपूर येथून देवदर्शन करून घरी परतत होते. या अपघातातील जखमींना अकोला येथील रुग्णालयात दाखल करण्यात आलेय. बुलढाणा जिल्ह्यातील शेगाव येथील भाविक पंढरपूर येथे विठ्ठलाच्या दर्शनासाठी गेले होते. पंढरपूरहून घरी परतत असताना या भाविकांच्या वाहनाला शेगावात मोठा अपघात घडला. शेगाव शहराच्या प्रवेशद्वाराजवळ भाविकांना घेऊन येणारी क्रुझर गाडी ही शहराच्या प्रवेशद्वारा वर लावण्यात आलेल्या स्वागत फलकाच्या पिलरवर धडकली. सकाळी 6 वाजता झालेल्या या अपघातात 3 जणांचा घटनास्थळीच मृत्यू झाला तर 7 भावीक गंभीर जखमी झाले आहेत. नागरिकांच्या मदतीने सर्व भाविकांना शेगावच्या सईबाई मोटे उपजिल्हा रुग्णालायात दाखल करण्यात आले. यानंतर गंभीर जखमी असलेल्या भाविकांना पुढील उपचारार्थ अकोल्यात हलवण्यात आले आहे. चालकाला झोप लागल्याने हा अपघात झल्याचेचे समजते. रात्री पासून हा प्रवास सुरु होता. आणि अगदी त्यांच्या घरापासून फक्त 2 किलो मीटर अंतरावर असताना हा अपघात घडल्याची माहिती पुढे आलीय.