मुंबई : छगन भुजबळ यांची मराठा समाजाबाबतची (Chhagan Bhujbal) वक्तव्ये दोन समाजात तेढ निर्माण करणारी असून यापुढे भुजबळांच्या कोणत्याही कार्यक्रमाला उपस्थित राहणार नसल्याचे विरोधी पक्ष नेते विजयव वडेट्टीवार यांनी सांगितले. (Vijay Wadettiwar) तर माझा एकटा लढा सुरु राहील, अशी प्रतिक्रियावर भुजबळ यांनी त्यावर व्यक्त केली आहे.
भुजबळांच्या भूमिकेवर वडेट्टीवार यांनी टीका केली. छगन भुजबळ टोकाची भूमिका घेत आहेत. ते म्हणाले, मी यापुढे भुजबळांच्या कोणत्याही मंचावर जाणार नाही. भुजबळांना विरोध किंवा समर्थनाचा प्रश्न नाही, त्यांनी टोकाची भूमिका घेतल्याने विरोध आहे. भुजबळांच्या भूमिकेमुळे समाजात तेढ वाढत आहे. त्याला आमचा विरोध आहे. महत्वाचं म्हणजे भुजबळांचे मत म्हणजे समाजाची भूमिका होत नाही. आपला हक्क मांडत असताना दोन समाजात तेढ निर्माण होईल, याला माझा पाठिंबा नाही. समाजात दोन गट पडतील तर याला आमचा विरोध आहे, त्या भूमिकेला आमचं समर्थन नाही. भूमिका मांडताना टोकाची भूमिका असू शकत नाही. समाजाच्या समस्या सोडवायच्या आहे. गावागावात भांडण झाली तर त्याला कोण जबाबदार राहणार आहे. सत्तेत असलेल्या माणसाने समस्या सोडवायच्या असतात मांडायच्या नसतात, याकडे त्यांनी लक्ष वेधले.
काय म्हणाले भुजबळ
भुजबळ म्हणाले की, माझ्या कोणत्या भूमिकेला त्यांचा विरोध आहे ते कळले नाही. एकटा तर एकटा लढा सुरू राहील. शेंडगेसारखे अनेक नेते माझ्या सोबत आहेत त्यांना घेऊन लढा सुरू राहणार आहे. ओबीसीमधून मराठ्यांना आरक्षण देऊ नका ही भूमिका वडेट्टीवार यांची होती. जे कुणबी आहेत त्यांबद्दल माझे काहीच म्हणणे नाही. मी कोणतीही टोकाची भूमिका घेतली नाही, असे भुजबळ म्हणाले.
