अकोल्यात पोळा सणाला गालबोट; तिघे वाहून गेले

अकोला, 6 सप्टेंबर: पोळा सणानिमित्त बैल धुण्यासाठी नदीत गेलेल्या आगर येथील युवकाचा गाव तलावात पडून वाहून गेल्याने मृत्यू झाल्याची घटना आज दुपारी घडली. तर काटेपूर्णा नदीमध्ये ही दोन जण बैल धुण्यासाठी गेलेले असताना तेही नदीत वाहून गेल्याची घटना समोर आली आहे. दरम्यान, आगर येथील मनोज खाडे हा युवक गाव तलावात वाहून गेल्यानंतर त्याला नागरिकांनी बाहेर काढले. मात्र, इतर दोघांचा अजूनही तपास सुरू आहे. सागर कावरे आणि गोपाल कांबे असे दोघांची नावे आहेत.

सर्वत्र पोळा उत्सव साजरा होत असताना या दिवशी बैलांची पूजा करण्याची प्रथा आहे. बैल धुण्यासाठी ग्रामीण भागातील नागरिक हे जवळच्या नदीवर जात असतात. नदीवर बैलांना धुतल्यानंतर ते घरी आणून त्याची पूजा करीत असतात. मात्र, बराच वेळा नदीला पाणी जास्त असल्याने अनेक युवक किंवा नागरिक हे नदीच्या पात्रामध्ये वाहून जात असल्याने त्यांचा मृत्यू झाल्याच्या घटना याआधीही घडलेल्या आहेत.

अकोला तालुका आणि बार्शीटाकळी तालुक्यातील असे तीन जण नदीत वाहून गेल्याची घटना समोर आली आहे. आगर येथील मनोज खाडे हा बैल धुण्यासाठी गाव तलावात गेला असता त्याचा पाय घसरून तो तलावात बुड्याल्याची घडना घडली. ग्रामस्थांच्या लक्षात हा प्रकार येताच त्यांनी त्याला बाहेर काढले.

तर बार्शीटाकळी तालुक्यातील कानशिवणी येथील दोन युवक पार्डी येथील काटेपुर्णा व पिंजर्डा नदीच्या संगमावर बैल धुत असतांना काटेपुर्णा नदीत वाहून गेले. सागर गोपाल कावरे(21)आणि गोपाल महादेव कांबे(19) असे दोघांची नावे आहेत. पिंजर पोलिस ठाण्याअंतर्गत ही घटना घडली आहे. या दोघांचा शोध घेण्यात येत आहे.

© 2020-21 Maharashtra Telecommunications Shankhnaad News Network, All rights Reserved | Site by final Version Software Solutions Pvt. Ltd.