नागपुरातील मानेवाड्यात भरदुपारी घरफोडी

Share This News

चोरट्याने रोकड आणि दागिने असा एकूण २० लाखांचा ऐवज लंपास केला

मानेवाड्यातील आकाशनगर येथे राहणाऱ्या बिल्डरकडे धाडसी घरफोडी करून चोरट्यांनी रोख रकमेसह तब्बल २० लाखांचे दागिने लंपास केले. अवघ्या पाच मिनटांत चोरट्याने दागिने व रोख रकमेवर हात साफ केला. ही घटना बुधवारी दुपारी ३ वाजताच्या सुमारास उघडकीस आली. या घटनेने पोलिसांमध्ये प्रचंड खळबळ उडाली आहे. हुडकेश्वर पोलिसांनी घरफोडीचा गुन्हा दाखल करून चोरट्याचा शोध सुरू केला आहे.

संदीप श्रीराम नितनवरे (वय ४० ) हे बिल्डर व शस्त्रक्रिया साहित्य वितरक आहेत. त्यांच्या पत्नी १७ नोव्हेंबरला माहेरी गेल्या. संदीप घरी एकटेच होते. त्यांनी उमरेडमधील भूखंड विकला.यातून त्यांना १७ लाखांची रोख मिळाली. ही रक्कम त्यांनी आलमारीत ठेवली. बुधवारी दुपारी संदीप हे घराला कुलूप लावून बाहेर गेले. यादरम्यान दरवाजाचे कुलूप तोडून चोरटा घरात घुसला. आलमारीतील १७ लाखांची रोख व तीन लाख ४५ हजार रुपये किमतीचे दागिने, असा एकूण २० लाख ४५ हजार रुपये किमतीचा ऐवज घेऊन चोरटा पसार झाला.

दुपारी ४ वाजताच्या सुमारास संदीप घरी परतले. त्यांना दरवाजाचे कुलूप तुटलेले दिसले. आलमारीतील रोख व दागिने गायब होते. संदीप यांनी तत्काळ हुडकेश्वर पोलिस स्टेशन गाठले. पोलिसांचा ताफा संदीप यांच्या घरी पोहोचला. पोलिसांनी संदीप यांच्या घरातील सीसीटीव्ही फुटेज तपासले. ३ वाजताच्या सुमारास तोंडाला दुपट्टा बांधलेला युवक घरात घुसला. अवघ्या पाच मिनिटांनंतर तो दागिने व रोख घेऊन घराबाहेर पडत असल्याचे सीसीटीव्ही फुटेजमध्ये दिसते. पोलिसांनी सीसीटीव्ही फुटेज जप्त केले आहे. परिसरातील अन्य सीसीटीव्ही फुटेजच्या आधारे पोलिस चोरट्याचा शोध घेत आहेत. संदीप यांच्याकडे लाखो रुपये असल्याची माहिती चोरट्याला असावी, टीप देऊन ही घरफोडी करण्यात आल्याची शक्यताही पोलिसांनी वर्तविली आहे. याप्रकरणी हुडकेश्वर पोलिसांनी घरफोडीचा गुन्हा दाखल केला आहे.


Share This News

Leave a Reply

Your email address will not be published. Required fields are marked *

© 2020-21 Maharashtra Telecommunications Shankhnaad News Network, All rights Reserved | Site by final Version Software Solutions Pvt. Ltd.