काँग्रेस प्रदेशाध्यक्षपद स्वीकारताच नाना पटोले नागपुरातील घरी, मातोश्रींकडून औक्षणाने स्वागत

नागपूर : काँग्रेस प्रदेशाध्यक्षपदाची जबाबदारी स्वीकारल्यानंतर नाना पटोले  पहिल्यांदाच होमग्राऊण्डवर गेले. नागपुरातील घरी जाऊन नाना पटोलेंनी मातोश्रींचा आशिर्वाद घेतला. यावेळी नानांच्या माऊलीने त्यांचे औक्षण करुन स्वागत केले. या क्षणी मायलेक काहीसे भावूक झाल्याचे पाहायला मिळालं.

नाना पटोले यांचं दिल्लीहून सकाळी 11 वाजता नागपूर विमानतळावर आगमन झालं. त्यानंतर काँग्रेसकडून त्यांचं जंगी स्वागत करण्यात आलं. विमानतळावरुन दीक्षाभूमी, टेकडी गणेश मंदिर आणि ताजबागला पटोलेंनी भेट दिली.

“नरेंद्र मोदी यांनी नटसम्राट व्हावं”

नाना पटोलेंनी दीक्षाभूमीवर जाऊन वंदन केलं. जनतेला भाजप विरोधात उभं करण्याची प्रेरणा या दीक्षाभूमीतून घेऊन जात असल्याचं यावेळी पटोले म्हणाले. पंतप्रधान नरेंद्र मोदी यांच्यावरही त्यांनी सडकून टीका केली. नरेंद्र मोदी यांनी नटसम्राट व्हावं, चित्रपटात काम करावं. लोकतंत्रात असा ड्रामा चालत नाही, अशा शब्दात पटोले यांनी पंतप्रधान मोदींवर निशाणा साधला.

‘काँग्रेसमध्ये गटबाजी दिसणार नाही’

काँग्रेस प्रदेशाध्यक्षपदाबाबत बोलताना आपल्याला हायकमांडनं ऊर्जा देण्याचं काम केलं. ही ऊर्जा पुढे नेण्याचं काम आता करणार असल्याचं सांगितलं. नाना पटोले यांना मंत्रिपद मिळण्याबाबतही चर्चा सुरु आहे. त्यावर बोलताना नाना पटोलेंचा खुर्चीचा विषय नाही. त्यामुळे ते सोडून बोला, असं ते म्हणाले. नवा विधानसभा अध्यक्ष कोण होणार? हे हायकमांड ठरवेल. आता काँग्रेसमध्ये गटबाजी दिसणार नाही, असा दावाही यावेळी पटोलेंनी केला.

नाना पटोले फक्त प्रदेशाध्यक्षच?

नाना पटोले काँग्रेस प्रदेशाध्यक्ष होणारच होते. ते झालेही पण त्यांनी सोबत मंत्रिपदाचीही मागणी केली आणि काँग्रेसमध्येच वेगवेगळ्या चर्चा सुरु झाल्या. आताही पटोलेंना मंत्रीपद मिळणार की नाही याची चर्चाच सुरु आहे. राऊत, पटोले एकत्र सोनियांना भेटले म्हणून राऊतांचं ऊर्जा खातं पटोलेंना मिळणार अशीही चर्चा सुरु आहे.

आता संग्राम थोपटेंच्या नावामुळे पटोले फक्त प्रदेशाध्यक्षच रहातील आणि त्यांनी पक्षविस्तारासाठी पूर्ण वेळ द्यावा असं काँग्रेस हायकमांडला अपेक्षित असल्याचं सांगितलं जातं आहे. त्यातच राऊत ऊर्जा खातं सहज सोडतील अशी शक्यताही कमी आहे. पटोलेंसाठी ऊर्जा खातं सोडलं तर मग राऊत सभाध्यक्ष होणार का? अशीही काँग्रेस गोटात चर्चा रंगली आहे.

Leave a Reply

Your email address will not be published. Required fields are marked *

© 2020-21 Maharashtra Telecommunications Shankhnaad News Network, All rights Reserved | Site by final Version Software Solutions Pvt. Ltd.