बच्चू कडूंना २ वर्षांच्या कारावासाची शिक्षा, काय आहे प्रकरण?

0

नाशिक : नाशिकच्या महापालिका आयुक्तांवर हात उगारल्याप्रकरणी माजी मंत्री व आमदार बच्चू कडू यांना नाशिक सत्र न्यायालयाने 2 वर्षांच्या तुरुंगवासाची शिक्षा सुनावली (Former Minister Bachchu Kadu gets 2 year Jail) आहे. या निकालाविरोधात वरच्या न्यायालयात जाऊ तसेच, नाशिक जिल्हा सत्र न्यायालयातच जामिनासाठी अर्ज करणार आहे, अशी माहिती आमदार बच्चू कडू यांनी प्रसार माध्यमांशी बोलताना दिली. न्यायालयाच्या निकालानंतर पोलिसांनी बच्चू कडू यांना ताब्यात घेतले असून त्यांना नाशिक सत्र न्यायालयात हजर करण्यात आले आहे. येथे जामिनाची प्रक्रिया पूर्ण केली जाणार असल्याचे सूत्रांनी सांगितले. दिव्यांग कल्याण निधी खर्च केला नाही या वादातून आमदार बच्चू कडू यांनी महापालिका आयुक्त अभिषेक कृष्णा यांना मारहाण करण्याचा प्रयत्न केला गेला होता. तसेच शिवीगाळ केली होती. यावर पोलिसांनी हस्तक्षेप करत पुढील घटना थांबवली आणि कडू यांना ताब्यात घेतले होते. सरकारवाडा पोलीस स्टेशन येथे याप्रकरणी गुन्हा नोंदविला होता. कडू यांना भादंविचे कलम 353 अन्वये दोन वर्षाची शिक्षा ठोठावण्यात आली आहे.
2017 मध्ये नाशिक महापालिकेत अपंगांच्या मागण्यांसाठी आंदोलन सुरु होते. महापालिका आयुक्त यांना धमाकवने आणि मारहाण करण्याचा प्रयत्न केल्याचा आरोप आमदार बच्चू कडू यांच्यावर होता. तसेच सरकारी कामात अडथळा आणल्या प्रकरणी 353 अंतर्गत गुन्हा दाखल करण्यात आला होता.
बच्चू कडू हे तीन वेळा आमदार अचलपूर मतदारसंघातून अपक्ष आमदार म्हणून पुन्हा निवडून आले आहेत. तीन वर्षांपूर्वी राज्यात मुख्यमंत्री उद्धव ठाकरे यांच्या नेतृत्वाखालील महाविकास आघाडीच्या सरकारमध्ये ते शिवसेनेच्या कोट्यातून राज्यमंत्री म्हणून नियुक्त झाले होते. गेल्यावर्षी जून महिन्यात शिवसेनेतील फुटीनंतर त्यांनी ठाकरे गटाची साथ सोडली व ते शिंदे गटात दाखल झाले आहेत.