वृक्षारोपणासह पर्यावरण जनजागृती; भंडाऱ्यात नागरिकांचा उत्स्फूर्त सहभाग

भंडारा (Bhandara): जागतिक पर्यावरण दिनानिमित्त भंडारा येथे उत्साही ज्येष्ठ नागरिकांच्या पुढाकारातून वृक्षारोपण आणि पर्यावरण जनजागृतीचा उपक्रम उत्साहात पार पडला. ओबीसी क्रांती मोर्चाचे संस्थापक अध्यक्ष संजय मते यांच्या मार्गदर्शनाखाली आयोजित या कार्यक्रमात उपस्थितांनी वृक्ष लागवड करून त्यांचे संवर्धन, संगोपन आणि संरक्षण करण्याची जबाबदारी स्वीकारली. तसेच प्रत्येकाने आपल्या परिसरात किमान एक झाड लावून ते जगविण्याचा संकल्प केला.

यावेळी पर्यावरण संवर्धनाचे महत्त्व अधोरेखित करताना वक्त्यांनी वाढती वृक्षतोड, प्लास्टिक प्रदूषण, तापमानवाढ आणि घटती जैवविविधता याबाबत चिंता व्यक्त केली. पर्यावरणाचे रक्षण करणे ही काळाची गरज असून प्रत्येक नागरिकाने त्यासाठी सक्रिय योगदान देणे आवश्यक असल्याचे मत व्यक्त करण्यात आले. वृक्षारोपण, प्लास्टिकचा कमी वापर, पाणी व ऊर्जेची बचत, स्वच्छता मोहीम आणि पर्यावरणाबाबत जनजागृती या माध्यमातून निसर्ग संवर्धनासाठी हातभार लावण्याचे आवाहन करण्यात आले.

कार्यक्रमात बोलताना संजय मते यांनी वृक्षांचे महत्त्व अधोरेखित केले. ते म्हणाले, “मानव स्वतःच्या सुखसोयींसाठी हजारो रुपये खर्च करून कुलर, पंखे किंवा एसी खरेदी करतो, मात्र केवळ काही रुपयांत एक झाड विकत घेऊन त्याची लागवड करण्याकडे दुर्लक्ष करतो. वृक्ष मानवाला प्राणवायू, सावली आणि जीवन देतात. वृक्ष कधीही भेदभाव करत नाहीत. ते राजा आणि रंक दोघांनाही समान सावली देतात. त्यामुळे वृक्षसंवर्धन ही प्रत्येकाची सामूहिक जबाबदारी आहे.”

या उपक्रमात सेवानिवृत्त प्राध्यापक विद्यानंद भगत, प्रसिद्ध सुवर्णकार प्रतीन फाये, यशवंत गायधने, ओमप्रकाश मोहबंशी यांच्यासह अनेक नागरिक सहभागी झाले होते. कार्यक्रमाच्या माध्यमातून पर्यावरण संरक्षणाचा संदेश समाजापर्यंत पोहोचविण्यात आला.