अरवल, 06 मे : बिहारच्या अवरल येथे ट्रक आणि रिक्षा यांच्यात धडक होऊन झालेल्या भीषण अपघातात 5 जणांचा मृत्यू झाला आहे. राष्ट्रीय महामार्ग क्र. 139 वर झालेल्या या भीषण अपघातामुळे वाहनांची लांबच लांब रांगा लागल्या होत्या.
यासंदर्भातील अधिकृत माहितीनुसार शुक्रवारी 5 मे रोजी रात्री राष्ट्रीय महामार्ग 139 वर औरंगाबादच्या दिशेने जाणारा ट्रक आणि रिक्षा यांच्या जोरदार टक्कर झाली. भरधाव वेगात येणाऱ्या ट्रकने रिक्षाला पाठीमागून जोरदार धडक दिली. या धडकेत रिक्षा काही अंतरावर फेकली गेली. अपघात इतका भीषण होता की यात रिक्षाचे वरचे छत वेगळे झाले. या दुर्घटनेत रिक्षात बसलेल्या 5 जणांचा घटनास्थळीच मृत्यू झाला. अपघाताची माहिती मिळताच पोलिसांनी घटनास्थळी धाव घेतली मृतदेह शवविच्छेदनासाठी पाठवले आहेत. मृत व्यक्तींची ओळख अद्याप पूर्ण पटली नसून ते जगदीशपुर आरा येथील रहिवासी असल्याचा अंदाज पोलिसांकडून वर्तवला जात आहे. या भीषण अपघातानंतर रस्त्यावर मोठी वाहतूक कोंडी निर्माण झाली होती. तब्बल तासभर रस्त्यावर वाहनांच्या लांबच लांब रांगा लागल्या होत्या. पोलिसांनी यावेळी मृतदेह ताब्यात घेतल्यानंतर वाहतूक कोंडी सुरळीत करण्यात आली.
