13 वर्षांनंतर खटला अंतिम टप्प्यात!
नागपूर (Nagpur): विदर्भात मोठी खळबळ उडवून देणाऱ्या आणि हजारो गुंतवणूकदारांना आर्थिक फटका बसलेल्या श्रीसूर्या गुंतवणूक प्रकरणातील न्यायालयीन सुनावणी आता निर्णायक वळणावर पोहोचली आहे. सुमारे 13 वर्षांपासून सुरू असलेल्या या खटल्यात अभियोजन पक्षाकडून बहुतेक पुरावे आणि साक्षी पूर्ण करण्यात आल्या असून, आता काही महत्त्वाच्या प्रक्रियेनंतर अंतिम युक्तिवाद होणार आहे. त्यामुळे या बहुचर्चित प्रकरणाचा निकाल लवकरच जाहीर होण्याची शक्यता व्यक्त केली जात आहे.
विशेष एमपीआयडी न्यायालयात सुरू असलेल्या या खटल्यात आतापर्यंत 75 साक्षीदारांची साक्ष नोंदवण्यात आली आहे. केवळ दोन तपास अधिकाऱ्यांच्या उलटतपासणीनंतर सुनावणीचा अंतिम टप्पा सुरू होणार आहे. त्यामुळे गेल्या अनेक वर्षांपासून न्यायाच्या प्रतीक्षेत असलेल्या हजारो गुंतवणूकदारांच्या अपेक्षा पुन्हा उंचावल्या आहेत. तपासात समोर आलेल्या माहितीनुसार, श्रीसूर्या समूहाने गुंतवणूकदारांना 25 ते 40 टक्क्यांपर्यंत आकर्षक परताव्याचे आश्वासन देत मोठ्या प्रमाणावर निधी गोळा केला होता. यासाठी विविध भागांत एजंटांचे जाळे उभारण्यात आले होते. सुरुवातीला काही गुंतवणूकदारांना परतावा देण्यात आल्याने लोकांचा विश्वास वाढला; मात्र नंतर परतावा आणि मूळ रक्कम दोन्ही अडकल्याने तक्रारींचा ओघ सुरू झाला.
चौकशीदरम्यान बांधकाम, डेअरी, आरोग्यसेवा, वाहतूक, जिम, रेस्टॉरंट आणि विमा व्यवसायांच्या माध्यमातून विश्वासार्ह प्रतिमा निर्माण करून निधी उभारल्याचे आरोप समोर आले. या व्यवहारांमधून सुमारे 200 कोटी रुपयांचा आर्थिक गैरव्यवहार झाल्याचा दावा तपास यंत्रणांनी केला आहे. या प्रकरणातील मुख्य आरोपी समीर जोशी याला ऑक्टोबर 2013 मध्ये अटक करण्यात आली होती. जवळपास आठ वर्षांच्या कारावासानंतर त्याला 2021 मध्ये जामीन मंजूर झाला. सध्या या प्रकरणातील सर्व आरोपी जामिनावर असून न्यायालयीन प्रक्रिया सुरू आहे.
समीर जोशी, पल्लवी जोशी यांच्यासह 25 जणांविरुद्ध फसवणूक, विश्वासघात आणि आर्थिक गैरव्यवहारासंबंधी विविध गंभीर कलमांखाली गुन्हे दाखल करण्यात आले आहेत. आता न्यायालयाचा अंतिम निर्णय काय येतो आणि गुंतवणूकदारांना कितपत दिलासा मिळतो, याकडे संपूर्ण विदर्भाचे लक्ष लागले आहे. आर्थिक गुन्ह्यांशी संबंधित प्रकरणांमध्ये हा निकाल महत्त्वाचा मानला जात आहे.
