sambhaji bhide संभाजी भिडे यांच्या ‘ऑडिओ’ची फॉरेन्सिक तपासणी होणार 

0

 

अमरावती- अमरावती येथे २७ जुलै रोजी येथील राष्ट्रपिता महात्मा गांधी व इतर महापुरुषांबाबत वादग्रस्त विधान करून लोकांमध्ये असंतोष पसरविण्याचा आरोप असलेल्या संभाजी भिडे यांच्या वक्तव्याचे ऑडिओ फॉरेन्सिक तपासणीसाठी पाठविण्यात येणार आहेत. राजापेठ पोलिसांनी संभाजी भिडे व आयोजकांना यापूर्वीच नोटीस जारी केली आहे. यानुसार संभाजी भिडे यांना ८ दिवसात अमरावती पोलिसांकडे हजर राहण्याचे आदेश देण्यात आले आहेत. भिडे यांना दाखल गुन्ह्याच्या अनुषंगाने त्यांचे म्हणणे मांडण्याची सूचना करण्यात आली आहे.
त्यामुळे ८ दिवसात संभाजी भिडे अमरावती पोलिसांपुढे हजर राहतात का? याकडे लक्ष लागलं आहे. याच संदर्भात राज्यात ज्या- ज्या ठिकाणी भिडेंवर गुन्हे दाखल झाला, त्या ठिकाणचे गुन्हे अमरावतीत वर्ग करण्यात आले असल्याची माहिती पोलीस आयुक्त नवीनचंद्र रेड्डी यांनी दिली आहे. संभाजी भिडे यांनी २७ जुलै रोजी सायंकाळी ६ ते १० या कालावधीत एका मंगल कार्यालयात उद्बोधन केले होते. त्या दरम्यान, त्यांनी महापुरुषांबाबत वादग्रस्त विधान करून व लोकांमध्ये असंतोष पसरवून विविध समाजघटकांमध्ये वाद वाढविण्याचे भाष्य केले. तथा महापुरुषांची बदनामी केली. या तक्रारीवरून राजापेठ पोलिसांनी संभाजी भिडे (रा. सांगली), निशांतसिंह जोध, अविनाश मरकल्ले व इतरांविरुद्ध गुन्हा दाखल केला होता. त्या गुन्ह्याच्या अनुषंगाने संभाजी भिडे यांना नोटीस जारी करण्यात आली असल्याची माहिती पोलिस आयुक्त नवीनचंद्र रेड्डी यांनी दिली.