अकोलाः शिवसेनेच्या ठाकरे गटातील आमदार नितीन देशमुख आणि आमदार रवि राणा यांच्यातील वाद चांगलाच पेटला असून आमदार देशमुख यांनी आज अपशब्दांचा वापर करीत राणा यांचा उल्लेख केल्याने या दोन नेत्यांमधील (Nitin Deshmukh criticizes Ravi Rana) वाद विकोपाला जाण्याची शक्यता व्यक्त होत आहे. अलिकडेच एसीबीने आमदार नितीन देशमुख यांना नोटीस बजावत बयाण नोंदविण्यासाठी पाचारण केले आहे. राणा यांच्यावर टीका करताना नितीन देशमुख यांची जीभ घसरली. रवि राणा हे बायकोच्या जीवावर राजकारण करत असल्याचा आरोप देशमुख यांनी केला आहे. नितीन देशमुख म्हणाले, मी बायकोच्या भरवश्यावर राजकारण करणारा माणूस नाही. जनतेच्या आणि स्वत:च्या कामाच्या भरवश्यावर आम्ही राजकारण करतो असे सांगत त्यांनी अपशब्दांचा वापर केला.
आमदार देशमुखे म्हणाले की, हा महाराष्ट्रातील आहे की नाही हे सुद्धा लोकांना माहित नाही. तरी मराठी माणसाने यांना मोठे केले. येणाऱ्या निवडणुकीत मराठी माणसे त्याला त्याची जागा दाखवतील. दरम्यान, राणा यांनीही देशमुख यांच्यावर पलटवार केला. आमदार नितीन देशमुख कोण आहे, हे मला अधिवेशनात माहित झाले होते. पोलिसांना मारहाण प्रकरणात त्यांच्यावर गुन्हा दाखल असून उद्धव ठाकरे यांच्यासोबत ज्यांनी ज्यांनी चुकीची कामे केली, त्यांच्या पापाचा घडा भरला असल्याचे ते म्हणाले. कायदे हातात घेतले तर त्याला कायदेशीर उत्तर देण्याचे काम एकनाथ शिंदे आणि देवेंद्र फडणवीस यांच्या सरकारमध्ये होणार असल्याचे राणा म्हणाले. हा जो फडफड करणारा नितीन देशमुख आहे. जो खऱ्या अर्थाने एकनाथ शिंदे यांना धोका देऊन परत आला असून तो काही दिवसांनी शिंदे गटात दिसेल, असा दावाही त्यांनी केला.
