नागपूर. भौगोलिक दृष्ट्या देशाच्या मध्यभागी असलेले नागपूर (Nagpur) लॉजिस्टिक हब (logistics hub ) म्हणून पुढे येत आहे. येथील मेट्रो, मिहान आणि इतर विविध विकास प्रकल्पांसह आयात-निर्यातीतही पुढे जात आहे. येथून तांदूळ, कापूस, ट्रॅक्टर तसेच इतर अनेकप्रकारचा माल विदेशात पाठविला जाऊ लागला आहे. विदर्भाचा तांदूळ रशिया, इराणसह आफ्रिकन देशांत खूप पसंत केला जातो. त्यामुळेच विदर्भात उत्पादित होणाऱ्या तांदळाची मागणी या देशांमध्ये मोठ्या प्रमाणात वाढली आहे (Big increase in rice export from Nagpur). एक ते दीड वर्षापूर्वी जी निर्यात 35 ते 40 टक्के होती ती आता 60 टक्के झाली आहे. त्याचप्रमाणे आयातही 40 टक्क्यांनी वाढली आहे. वाढत्या निर्यात आणि आयातीमुळे, मिहानस्थित कॉनकॉरच्या मल्टी मॉडेल लॉजिस्टिक पार्कचे महत्त्व वाढले आहे. दिवसेंदिवस याची व्याप्ती वाढत आहे. सन 2022 मध्ये म्हणजेच 10 महिन्यांत येथून 7 लाख मेट्रिक टन तांदूळ निर्यात करण्यात आला.
फूड, ट्रॅक्टर व पेपर्सची विदेशात मागणी
मिहानमधून अंतर्गत व्यवसायाबरोबरच देशांतर्गत व्यवसायही मोठ्या प्रमाणात वाढत आहे. महिंद्रा अँड महिंद्राचे ट्रॅक्टर, पेपर्ससह फूड्स मोठ्या प्रमाणात बाहेर जात आहे. जानेवारी-23 मध्ये निर्यात आणि आयात दोन्हीमध्ये मोठी उडी होती. दर महिन्याला 5 हजार कंटेनर माल पाठविला जातो आहे, त्यातील 3 हजार कंटेनर फक्त तांदळाचे असतात. यामध्ये जानेवारी-23 मध्ये कंटेनरची संख्या वाढून 6,000 झाली, त्यापैकी 3,330 तांदळाचे होते. अन्य वस्तू उर्वरित कंटेनरमध्ये जात आहेत. गेल्या वर्षी दहा महिन्यांत तांदळाचे सुमारे 2600 कंटेनर निघाले, त्यापैकी एकूण 7 लाख मेट्रिक टन तांदूळ निर्यात केला गेला. केवळ जानेवारी-23 मध्येच येथून एकूण 1,20,000 मेट्रिक टन माल पाठविण्यात आला. त्यापैकी 90,000 मेट्रिक टन तांदूळ होता. तांदळाचा प्रमुख पुरवठा गोंदिया आणि रायपूर येथून होतो आहे.
