गुन्ह्यांची माहिती लपविल्याचा आरोप
नागपूर. निवडणुकीवेळी दिलेल्या शपथपत्रात दोन गुन्ह्यांची माहिती लपविल्याप्रकरणी उपमुख्यंमंत्री आणि गृहमंत्री देवेंद्र फडणवीस शनिवारी स्वतः प्रथम श्रेणी न्यायदंडाधिकाऱ्यांच्या न्यायालयात हजर झाले. फडणवीस न्यायालयात येणार असल्याने परिसरात पोलिसांचा मोठा ताफा तैनात करण्यात आला होता. न्यायालयाला पोलिस छावणीचे स्वरूप आले होते. मोठ्या प्रमाणात भाजपा कार्यकर्तेसुद्धा उपस्थित होते. सुरक्षेच्या दृष्टिकोनातून पोलिसांनी तगडा बंदोबस्त लावला होता. २०१४ मध्ये झालेल्या विधानसभा निवडणुकीचेळी दाखल केलेल्या शपथपत्रात दोन गुन्ह्यांची माहिती लपवली, असा आरोप ईडी प्रकरणातील आरोपी अॅलड. सतीश उके यांनी केला आहे. या प्रकरणात फडणवीस यांच्यावर गुन्हा दाखल करण्यात यावा, अशी मागणी त्यांनी प्रथम श्रेणी न्याय दंडाधिकारी न्यायालयापुढे केली आहे. या प्रकरणावर पुढील सुनावणी येत्या ६ मे रोजी होणार आहे.
देवेंद्र फडणवीस यांच्यावर कलम ४२०, ४६७, ४६८ बदनामी, फसवणूक, कागदपत्रांमध्ये फेरफार आदी गुन्हे दाखल करण्यात आले आहेत. त्यांनी २०१४ च्या निवडणुकीमध्ये शपथपत्र सादर करताना निवडणूक आयोगापासून गुन्हे लपविले होते. १९९९-२००० मध्ये फडणवीसांनी या प्रकरणात जामीन मिळविला होता. २०१९ च्या निवडणुकीत अर्ज भरताना त्यांनी या प्रकरणांची माहिती दिली नाही. उके यांनी या विषयावर जेएमएफसी न्यायालयात याचिका दाखल करून फडणवीस यांच्यावर कारवाई करण्याचे आदेश देण्याची विनंती केली होती. त्यामुळे या प्रकरणी नागपूर जिल्हा न्यायालयात देवेंद्र फडणवीस यांना आज १५ एप्रिल रोजी होणाऱ्या सुनावणीला उपस्थित राहावे लागले. आपली बाजू मांडताना फडणवीस यांनी माझ्यावरील आरोप राजकीय द्वेशातून करण्यात आल्याचे सांगितले. या आरोपातून मुक्तता करण्यात यावी, अशी त्यांची विनंती आहे.
नागपुरात रविवारी होणाऱ्या महाविकास आघाडीची वज्रमूठ सभेच्या निमित्ताने राजकीय वातावरण ढवळून निघाले आहे. एकीकडे विरोध आणि दुसरीकडे तयारी अशी स्थिती आहे. सभेच्या निमित्ताने मविआचे तर विकास कामांच्या भूमिपूजन सोहळ्यांच्या निमित्ताने भाजपचे असे राज्यातील मोठमोठे नेते आणि कार्यकर्ते सध्या नागपुरात आहेत. त्यातच फडणवीस यांनी न्यायालयात हजेरी लावाली लागली.
