कागलः राष्ट्रवादी काँग्रेसचे नेते हसन मुश्रीफ यांच्या कागल येथील घरावर आज पुन्हा एकदा ईडीकडून छापेमारी करण्यात (ED Raid on Hasan Mushrif) आली. गेल्या दीड महिन्यातील ही दुसरी कारवाई असून जानेवारी माहिन्यात मुश्रीफ यांच्या कोंढव्यातील नातेवाईकांच्या निवासस्थानी तसेच गणेशखिंड रस्त्यावरील एका कार्यालयात इडीच्या पथकाने छापा टाकला होता. संताजी घोरपडे साखर कारखान्यातील घोटाळाप्रकरणी मुश्रीफ यांच्या घराची ईडीकडून झाडाझडती घेतली जात आहे. कोलकात्यातील बोगस कंपन्यांमधून 158 कोटी रुपये या कारखान्यात ट्रान्स्फर झाले होते, असा आरोप भाजप नेते किरीट सोमय्या यांनी केला होता. हा पैसा आला कुठून? ही कंपनी आहे कुठे? हा मनी लॉन्ड्रिंगचा पैसा आहे, असा दावा किरीट सोमय्या यांनी केला होता. या प्रकरणी मुश्रीफ यांच्यावर कारवाई करण्याची मागणीही सोमय्या यांनी केली होती.
दरम्यान, हसन मुश्रीफ यांच्या घरावर गेल्या दीड महिन्यातील हा दुसरा छापा आहे. त्यामुळे मुश्रीफ यांच्या अडचणीत वाढ होण्याची शक्यता आहे. या कारवाईनंतर राष्ट्रवादी काँग्रेसचे कार्यकर्ते व मुश्रीफ समर्थक त्यांच्या घरासमोर मोठ्या संख्येने जमा झाले. या कारवाईविरोधात तसेच केंद्र सरकारच्या विरोधात राष्ट्रवादीचे कार्यकर्ते जोरदार घोषणाबाजी करीत आहेत. हसन मुश्रीफ सध्या घरी नाहीत. मात्र, त्यांच्या कुटुंबीयांनी या कारवाईविरोधात संताप व्यक्त केला आहे. मुश्रीफ यांना मुंबई उच्च न्यायालयाने काल शुक्रवारीच मोठा दिलासा दिला होता. हसन मुश्रीफ यांच्यावर तूर्तास कुठलीही कठोर कारवाई न करण्याचे निर्देश उच्च न्यायालयाने ईडीला दिले आहेत. मुश्रीफ यांनी मुंबई उच्च न्यायालयात ईडीने दाखल केलेला गुन्हा रद्द करण्यासाठी याचिका दाखल केली आहे.
