हारिश रंगुनवालावर आणखी एक गुन्हा दाखल
नागपूर. हॉटेल व्यावसायिकाला धमकावून लाखो रुपये उकळल्या प्रकरणी अटकेत असलेला कुख्यात गुंड हारिस आरीफ रंगुनवाला (35) रा. जाफरनगर (Jafarnagar ) विरोधात नागपूरच्या (Nagpur) सदर पोलिसांनी (Sadar police) आणखी एक गुन्हा नोंदविला आहे. नवीन प्रकरण ही एका व्यावसायिकाच्या तक्रारीवरूनच नोंदविण्यात आले आहे. सोबत व्यवसाय करण्याच्या नावावर हारिसने व्यवसायी सय्यद अजहर अली (61) यांना जाळ्यात अडकवले. नंतर त्याच्याकडून पैसे उकळत गेला. मुलाचे अपहरण करूनही त्याने अजहर यांच्याकडून 5.50 लाख रुपये उकळले. अली यांच्या तक्रारीवरून गुन्हा दाखल करण्यात आला आहे. त्यामुळे त्याच्या अडचणींमध्ये वाढ झाली आहे. त्याच्या विरोधात आणखी गुन्हे खाल होऊ शकतात, अशी शक्यता वर्तविली जात आहे. पोलिसांकडूनही रंगुनवालाची कुंडलीच तपासून त्याच्या साऱ्या भानगडी समोर आणण्याचे प्रयत्न केले जात आहेत.
अजहर एसी दुरुस्तीचे काम करीत होते. सोबत काम करणाऱ्या दोन तरुणांच्या माध्यमातून 2019 मध्ये अजहर यांची ओळख हारिस याच्याशी झाली. हारिसने सांगितले की, त्याची नालसाहेब चौकात इलेक्ट्रॉनिक वस्तूंची दुकान आहे. त्याच्या दुकानातून माल खरेदी करत स्वत:ची दुकान सुरू करण्यास सांगितले. दुकानासाठी छावनीच्या बर्गरसिंग नावाच्या रेस्टॉरेंटजवळ एक जागा दाखवली. अजहर यांनी लाखो रुपये खर्च करून दुकानासाठी टिनाचे शेड तयार केले. हारिसला रोख रक्कम देऊन इलेक्ट्रॉनिक वस्तूंची खरेदी केली. काही वस्तू इतर व्यापाऱ्यांकडून खरेदी केल्या. दर महिन्याला हारिसला 25 हजार रुपये भाडेही दिले.
एप्रिल 2021 मध्ये हारिसने अजहरचे कुलूप तोडून स्वत:चे कुलूप लावत दुकानावर अवैधरित्या ताबा केला. इलेक्ट्रॉनिक वस्तूंचे 6.90 लाख रुपये दिल्यानंतरच दुकानातील सामान देईल असे सांगितले. अजहरकडून बळजोरीने काही धनादेशही घेतले. त्यानंतरही हारिस त्यांना त्रास देत होता. 12 नोव्हेंबर 2021 ला हारिस त्यांच्या घरी आला. 8 वर्षांचा मुलगा युसूफ याला सोबत घेऊन गेला. मुलाला जिवे मारण्याची धमकी देऊन 5.50 लाख रुपयांची खंडणी मागितली. मुलाचा जीव वाचविण्यासाठी अजहर यांनी हारिसला पैसे दिले आणि मुलाची सुटका करून घेतली. मात्र हारिसने त्यांना त्रास देणे सोडले नाही. एकूण 11.50 लाख रुपये घेतल्यानंतरही हारिसने अजहर यांना दुकानाचे सामान परत केले नाही. त्याचे गुन्हेगारांशी संबंध आणि गुन्हेगारी प्रवृत्तीच्या भीतीने अजहर यांनी तक्रार केली नाही. सदर ठाण्यात हारिस आणि त्याचा भाऊ जैन याच्या विरुद्ध गुन्हा नोंद झाल्यानंतर अजहर यांनी हिंमत करून पोलिसात तक्रार केली. हारिस विरुद्ध विविध कलमान्वये गुन्हा नोंदविण्यात आला. तो आधीच एका प्रकरणात पोलिस कोठडीमध्ये आहे
