महाराष्ट्रात आज मंत्रिमंडळाचा विस्तार होत असताना, शिवसेनेत नाराजीची नवी लाट उसळली आहे. भंडारा-पवनी विधानसभा क्षेत्राचे आमदार आणि शिवसेनेचे तीनदा आमदार म्हणून निवडून आलेले नेते नरेंद्र भोंडेकर यांनी शिवसेना उपनेते आणि विदर्भ समन्वयक या पदांचा राजीनामा दिला आहे. मंत्रिपदाच्या आश्वासनांवरून नाराजी असल्याचे समजते.
भोंडेकर यांनी मंत्रिमंडळात स्थान न मिळाल्याने आपली नाराजी उघडपणे व्यक्त केली आहे. त्यांचा राजीनामा मंत्रिमंडळ विस्तारावरून सुरू असलेल्या राजकीय हालचालींमध्ये नवीन चर्चा घडवून आणत आहे. विदर्भातील शिवसेनेच्या नेतृत्वाला डावलल्याचा आरोप आता जोर धरू लागला आहे.
सप्टेंबर महिन्यात नागपुरातील मुख्यमंत्री एकनाथ शिंदे यांच्या शासकीय निवासस्थान ‘रामगिरी’मध्ये प्रवेश न मिळाल्याच्या बातम्या समोर आल्या होत्या. गेट बंद असल्याने परत जावे लागल्याचा दावा करण्यात आला होता. मात्र, भोंडेकर यांनी त्यावेळी या वृत्ताचे खंडन केले होते. त्यांनी स्पष्ट केले होते की, “दहा मिनिटांनंतर मला शिंदे साहेबांचा फोन आला आणि त्यांनी भेटायला बोलावले.”
भोंडेकर यांच्या राजीनाम्यानंतर विदर्भात शिवसेनेची स्थिती अधिक कमजोर होण्याची शक्यता आहे. मंत्रिमंडळ विस्तारावरून नाराज असलेल्या नेत्यांची संख्या वाढल्यास शिवसेनेसमोर आव्हान उभे राहू शकते. आता शिवसेना आणि राज्य सरकार या नाराज आमदारांना कशा प्रकारे शांत करणार, हे पाहणे महत्त्वाचे ठरणार आहे.
