नागपूर :नागपुरातील कोंढाळी पोलीस ठाण्याच्या हद्दीत चाकडोह शिवारात अनियंत्रित स्कूटीसह 20 फूट खड्डयात पडल्याने निवृत्त अधिकाऱ्याचा मृत्यू झाला. पांचू गोपाल भट्टाचार्य (वय 64, रा. भूपेश नगर) नागपूर असे मृतकाचे नाव आहे. इंडियन ब्युरो ऑफ माइन्सचे सेवानिवृत्त अधिकारी असलेले पांचू भट्टाचार्य यांची कोंढाळीजवळ बिहालगोंदी शिवारात शेती आहे. काल, गुरुवारी दुपारी 12 वाजण्याच्या सुमारास पांचू भटाचार्य हे शेतीवर येण्यासाठी स्कूटी (एम.एच.31- एफ. व्ही. 9055)ने नागपूर येथून निघाले. मार्गात डिफेन्स गेटनजवळ त्यांची मित्र बबन काटोले (63, रा. नागपूर) यांच्याशी भेट झाली. काटोलेसुद्धा इंडियन ब्युरो ऑफ माईन्सचे कर्मचारी आहेत. त्यांची शेती पांचू यांच्या शेताशेजारीच बिहालगोंदी पांच भट्टाचार्य शिवारात आहे. ते मोटारसायकलने नागपूरकडून ब्युरो ऑफ शेताकडे जात होते.बबन काटोले पुढे, तर पांचू भट्टाचार्य मागे होते. बबन काटोले शेतात पोहोचले, पण पांचू भट्टाचार्य सायंकाळपर्यंत शेतातच आले नाही. त्यांच्या मोबाईलवर वारंवार कॉल करुनही ते फोन उचलत नव्हते. त्यामुळे याबाबतची माहिती सायंकाळी सहा वाजता कोंढाळी पोलिसांना देण्यात आली. कोंढाळीचे ठाणेदार पंकज वाघोडे यांच्यासह हेड कॉन्स्टेबल भोजराज तांदूळकर, किशोर लोही, दशरथ पवार, मंगेश धारपुरे, आदींनी मोबाईल फोनच्या लोकेशनच्या आधारे भट्टचार्य यांचा शोध सुरु केला. अखेरीस
दहा किलोमीटर अंतरावर मोबाईलचे लोकेशन मिळाले. रात्री आठ वाजण्याच्या सुमारास कोंढाळीपासून 10 कि.मी अंतरावर रोडपासून 20 फूट खाली एका खड्ड्यात स्कूटीसह भट्टाचार्य यांचा मृतदेह आढळून आला. भट्टाचार्य यांनी हेल्मेट घातले होते, पण लॉक नसल्याने स्कूटीसह खड्डयात पडल्याने डोके एका मोठ्या दगडावर आदळून त्यांचा जागीच मृत्यू झाला, दाट झाडी झुडपे असल्याने येणाऱ्या जाणाऱ्या वाहन चालकांना ते दिसत नव्हते. पोलिसांनी घटनास्थळाचा पंचनामा केला असता त्यांची स्कूटी चालू होती. त्यांच्याकडे रोख रक्कम व मोबाईल होता.
