बुलढाणा – शेगावचे योगिराज संत श्री गजानन महाराज यांच्या पालखीचे विदर्भात आणि बुलढाणा जिल्ह्याच्या सीमेजवळ म्हणजे सिंदखेडराजा येथे जालन्यातून आज आगमन झाले. पंढरपूरला आषाढी वारीसाठी ही पालखी शेगाव येथून रवाना झाली होती. आता पंढरपूर येथून आषाढी एकादशीचा उत्सव संपल्यावर श्री गजानन महाराज यांची पालखी शेगावकडे रवाना झाली आहे. शेकडो वारकरी, भजन दिंड्या,घोडे, वाहने यांच्यासह वाजत -गाजत भजन म्हणत गजानन महाराज यांची पालखी जिल्ह्यात परतली आहे. बुलढाणा जिल्ह्याच्या सीमेवर फटाके फोडून पालखीचे जल्लोषात स्वागत करण्यात आले. ही पालखी सिंदखेडराजा येथे आज मुक्काम करेल आणि मग ही श्रीक्षेत्र शेगावकडे प्रस्थान करणार आहे.
