नागपूर : जो नेता मृत्यूवर मात करू शकतो, आयुष्यात वाट्याला आलेल्या असंख्य संकटांतून मार्ग काढू शकतो, देशाच्या व महाराष्ट्राच्या विकासाची दूरदृष्टी ठेवू शकतो, सामाजिक समता, सर्वधर्म समभाव व बंधुभावाच्या विचाराचा जागर करून एकता व अखंडतेच्या ध्येयाने प्रेरित होऊन समाजहिताचे राजकारण करू शकतो, असे बहुआयामी व्यक्तिमत्त्वाचे आमचे हरहुन्नरी नेते व राष्ट्रवादी काँग्रेस पार्टीचे सर्वेसर्वा आदरणीय शरद पवार साहेब यांच्यासोबतच आमच्या निष्ठा व श्रद्धा लक्षात घेता त्यांच्यासोबतच राहण्याचा आमचा निर्धार असल्याचे प्रदेश पदाधिकाऱ्यांनी स्पष्ट केले. खासदार शरद पवार यांची मुंबई येथे यशवंतराव चव्हाण प्रतिष्ठानमध्ये प्रत्यक्ष भेट घेऊन आमचा पाठिंबा जाहीर केला, असे प्रदेश चिटणीस दिलीप पनकुले यांनी सांगितले. यावेळी माजी आमदार व प्रदेश सरचिटणीस दीनानाथ पडोळे, प्रदेश उपाध्यक्ष व कामगार नेते बजरंगसिंह परिहार यांनीसुद्धा याप्रसंगी आपला पाठिंबा जाहीर केला. पक्षाची ताकद वाढवण्यासाठी आम्ही कटिबद्ध आहोत अशी ग्वाही दिली. राष्ट्रवादी काँग्रेसचे अध्यक्ष शरद पवार हे लवकरच विदर्भ दौऱ्यावर येणार असल्याचे आश्वासन त्यांनी दिले.
