जयपूरमध्ये योजना भवनाच्या बेसमध्ये आढळल्या दोन हजारांच्या नोटा

0

जयपूर: दोन हजार रुपयांच्या नोटा चलनातून बाद करण्याचा निर्णय रिझर्व्ह बँकेने घेतल्यावर राजस्थानची राजधानी जयपूरमध्ये मोठ्या प्रमाणात दोन हजारांच्या नोटा आणि सोने सापडले आहे. राज्य सरकारच्या सचिवालयाजवळ असलेल्या योजना भवनाच्या बेसमेंटमध्ये २ कोटी ३१ लाख रुपयांपेक्षा अधिकची रोकड आणि एक किलो सोन्याचे बिस्किट सापडले आहेत. बेसमेंटमध्ये सापडलेल्या नोटा २ हजार आणि पाचशे रुपयांच्या आहेत. रोकड आणि सोने कोणाचे आहेत ते अद्याप समजू शकलेले नाही. प्रकरण समोर येताच अधिकारी वर्गात खळबळ उडाली आहे.
या प्रकारानंतर विरोधकांनी गहलोत सरकारवर निशाना साधला आहे.योजना भवनात सलेल्या फाईल्स काढून त्यांचं संगणकीकरण करण्याचं काम सुरू आहे. या दरम्यान योजना भवनातील बेसमेंटमधील कपाटांमध्ये पडून असलेल्या फाईल शोधल्या जात होत्या. त्यावेळी दोन कपाटांच्या चाव्या मिळाल्या नाहीत. या कपाटांच्या किल्ल्या शोधण्याचा प्रयत्न सुरू होता. मात्र त्या सापडल्या नाहीत. शुक्रवारी दुपारच्या सुमारास दोन्ही कपाटांची कुलूपं तोडण्यात आली. कपाटात घबाड सापडले. त्यात २००० रुपयांच्या ७,२९८ नोटा असल्याचे आढळून आले. त्याचे मूल्य १ कोटी ४५ लाख ९६ हजार रुपये इतके आहे. या कपाटात ५०० रुपयांच्या १७ हजार १०७ नोटा आढळल्या आहेत. त्यांचं मूल्य ८५ लाख ५३ हजार ५०० रुपये आहे. यासोबतच एक किलो सोन्याची बिस्किटे सापडली आहेत.