सोमनाथ मंदिर पाडून गझनीने कुठलीच चूक केली नव्हती-मौलाना रशिदी यांचे वादग्रस्त व्यक्तव्य

0

नवी दिल्लीः गुजरातमधील सोमनाथ मंदिर तोडून मोहम्मद गझनीने कोणतेही चुकीचे काम केले नाही, असे वादग्रस्त वक्तव्य ऑल इंडिया इमाम असोसिएशनचे अध्यक्ष मौलाना मोहम्मद साजिद रशिदी यांनी केले (Maulana Rashidi`s controversial Statement on Somnath Temple) आहे. एनएनआय शी बोलताना त्यांनी हे वक्तव्य केले आहे. त्यामुळे आता नवा वाद निर्माण होण्याची शक्यता व्यक्त होत आहे. मौलाना रशिदी हे वादग्रस्त वक्तव्य करण्यासाठी प्रसिद्धच असून यापूर्वीही त्यांनी राम मंदिराबाबत वादग्रस्त विधान केल्याने संतप्त प्रतिक्रिया व्यक्त झाल्या होत्या. मौलाना रशिदी म्हणतात की, “८०० वर्षांच्या मुघल साम्राज्यात अनेक बादशाहा होऊन गेलेत. त्यांचा इतिहास वाचला तर त्यांचा धर्माशी काहीही संबंध नव्हता, हे दिसून येईल. त्यांनी धर्माच्या नावावर कोणतंही काम केलं नाही. अशी अनेक उदाहरणं देता येईल.”
मोहम्मद गझनीने सोमनाथच्या मंदिराचा विध्वंस केल्याचे इतिहास सांगतो. त्याबद्धल बोलताना मौलाना रशिदी यांनी वेगळाच इतिहास सांगितला. “मोहम्मद गझनीने सोमनाथ मंदिर तोडल्याचे लोक सांगतात. प्रत्यक्षात इतिहास असा आहे की तेथील काही लोकांनी आस्थेच्या नावावर गैरप्रकार सुरू असल्याची तक्रार गझनीकडे केली होती. त्यानंतर गझनीने मंदिर परिसराची पाहणी केली. जेव्हा त्याला लोकांची तक्रारी खऱ्या आहेत, याची खात्री पटली, तेव्हा त्याने सोमनाथ मंदिरावर हल्ला केला. सोमनाथ मंदिर तोडून त्याने कोणतीही चूक केली नाही. गझनीने तिथे होणाऱ्या गैरकृत्यांना आळा घालण्याचं काम केले.”
रशिद यांच्या या वक्तव्यावर संतप्त प्रतिक्रिया उमटण्याची शक्यता व्यक्त होत आहे. यापूर्वीही मौलाना रशिद यांनी वादग्रस्त व्यक्तव्ये केली आहेत. आमच्या भावी पिढ्या राम मंदिर पाडून मशीद बांधतील, असा दावा मौलाना रशिद यांनी यापूर्वी केला असून त्यांच्या या वक्तव्यावर त्यांना संतापाला सामोरे जावे लागले होते.