नागपूर (Nagpur ):वर्धा -नागपूर मार्गावरील सेलू जवळील जंगलपूर (Junglapur)फाट्याजवळ राज्य परिवहन महामंडळाच्या एसटी बसचा टायर पंक्चर झाल्याने ही बस थांबली.या बसमधील प्रवासी दुसऱ्या बसमध्ये चढत असताना तिसरी बस पाठीमागून आली.अशाप्रकारे तीन बसेस एकमेकांना भिडल्या आणि हा विचित्र अपघात घडला. या अपघातात वाहन चालकासह सुमारे 10 प्रवासी जखमी झाले असल्याची घटना आज बुधवारी घडली.
नागपूर-वर्धा मार्गावर ( Nagpur-Wardha route) जंगलापूर फाट्याजवळ परिवहन महामंडळाची नागपूर वरून वर्धेच्या दिशेने येणारी एसटी क्रमांक एम एच ४० वाय ५५८५ या गाडीचा टायर पंक्चर झाल्याने ती बस रस्त्याच्या कडेला उभी करण्यात आली होती. त्या बसमधील प्रवाशांना दुसरी बस क्रमांक एम एच ०६ एस ८०९० या गाडीमध्ये बसविण्यासाठी ती एसटी सुद्धा थांबली असताना मागून भरधाव वेगाने येणाऱ्या क्रमांक एम एच २० बी एल ४१०४ या एसटीने उभ्या असलेल्या बसेसला जबर धडक दिली.या अपघातात वाहन चालकासह प्रवासी जखमी झाले.चालक गंभीर असल्याची माहिती आहे. अपघाताची माहिती मिळताच सेलू पोलिसांनी घटनास्थळी धाव घेत जखमींना रुग्णालयात उपचारासाठी दाखल केले. या विचित्र अपघातामुळे बराच वेळ नागपूर-वर्धा मार्गावर वाहतूक ठप्प होती. हळूहळू ही विस्कळीत झालेली वाहतूक सुरळीत करण्यात आली.