मुंबई: मतदारांनी पुन्हा एकदा गुजरातच्या विकासाच्या मॉडेलवर विश्वास दाखविला असल्याचे वक्तव्य राज्याचे महसूलमंत्री राधाकृष्ण विखे पाटील (Radhakrishna Vikhe Patil) यांनी केले आहे. काँग्रेसच्या नेतृत्वाने संन्यास घेऊन हिमालयात जावे असाच गुजरात विधानसभेचा निकाल (Gujarat Assembly Elections Result 2022) लागला असल्याची प्रतिक्रिया पाटील यांनी व्यक्त केली आहे. हिमाचलमध्ये काँग्रेसला यश येत असले तरी मतदारांनी स्थानिक नेतृत्व पाहुन काँग्रेसला मत दिल्याचे विखे पाटील म्हणाले. विखेपाटील यांनी शिवसेनेच्या ठाकरे गटाचे खासदार संजय राऊत यांच्यावरही निशाणा साधला. संजय राऊत हे ‘बिनबुडाचे गाडगे’ असल्याची टीका त्यांनी केली. गुजरातमध्ये भाजप विक्रमी विजयाच्या मार्गावर आहे तर हिमाचलमध्ये काँग्रेस बहुमत मिळविण्याच्या तयारीत आहे. या साऱ्या पार्श्वभूमीवर विखे यांनी प्रतिक्रिया व्यक्त केली.
गुजरातच्या ऐतिहासिक कामगिरीबद्दल विखे पाटील यांनी पंतप्रधान नरेंद्र मोदी आणि गृहमंत्री अमित शाह यांचे अभिनंदन केले. भाजपला गुजरातमध्ये 56 टक्के मतदान झालं आहे. हा देशाच्या इतिहासातील विक्रम असल्याचे विखे पाटील म्हणाले. गुजरातच्या विकासाच्या मॉडेलवर पुन्हा एकदा मतदारांनी विश्वास दाखवला असल्याचे पाटील म्हणाले. गुजरातमध्ये जरी भाजप आघाडीवर असले तरी हिमाचल प्रदेशमध्ये मात्र, भाजप पिछाडीवर आहे. हिमाचलमध्ये काँग्रेसचे नेतृत्व नव्हे तर स्थानिक नेतृत्वाला पाहून काँग्रेसला मतदान केले आहे, असे विखे पाटील म्हणाले. राधाकृष्ण विखे पाटील यांनी शिवसेना खासदार संजय राऊत यांच्यावरही जोरदार टीका केली. संजय राऊतांच्या आरोपांना काय उत्तर द्यावं. हे बिनबुडाचं गाडगे असल्याचा खोचक टोला विखे पाटलांनी लगावला. नॉन इश्यूला इश्यू करण्याचा त्यांचा केविलवाना प्रयत्न असल्याचे विखे पाटील म्हणाले. आगामी सर्व निवडणुकांमध्ये भाजप आणि त्यांची आघाडीच सत्तेवर येईल याचा मला विश्वास असल्याचे पाटील म्हणाले.
