कॅम्प चेरी फार्ममध्ये जागतिक पर्यावरण दिन उत्साहात साजरा

नागपूर (Nagpur):- रामटेक येथील कॅम्प चेरी फार्म येथे ५ जून रोजी जागतिक पर्यावरण दिनानिमित्त मुलांसाठी आणि कुटुंबांसाठी विशेष निसर्गाधारित मैदानी उपक्रमांचे आयोजन करण्यात आले. या कार्यक्रमाच्या माध्यमातून सहभागींचा निसर्गाशी पुन्हा जवळचा संबंध निर्माण करणे, स्क्रीनसमोरील वेळ कमी करणे आणि प्रत्यक्ष अनुभवातून शिक्षण देणे हा उद्देश होता.

कार्यक्रमात झाडांवर चढणे, आंबे खाण्याचा आनंद, कपूर बावडी ट्रेल आणि निसर्गभ्रमंती अशा विविध उपक्रमांचा समावेश होता. मुलांनी नैसर्गिक वातावरणाचा मनमुराद आनंद घेतला, प्रशिक्षित मार्गदर्शनाखाली झाडांवर चढण्याचा अनुभव घेतला आणि पर्यावरण संवर्धनाबाबत मनोरंजक पद्धतीने माहिती मिळवली.

निसर्गाच्या सान्निध्यात वेळ घालवल्यामुळे आत्मविश्वास वाढतो, शारीरिक तंदुरुस्ती सुधारते आणि निरीक्षण कौशल्ये विकसित होतात, याचे महत्त्व या कार्यक्रमातून अधोरेखित करण्यात आले. पालकांनीही या उपक्रमाचे आणि त्याचा मुलांवर होणाऱ्या सकारात्मक परिणामाचे कौतुक केले.

कार्यक्रम यशस्वी करण्यासाठी शिरीष देशमुख, तुषार काळे आणि रितेश कुंभारे यांचे सहकार्य लाभले.