नागपूर (NAGPUR)| नागपूर शहरातील एका सोनं रिफायनरीमधून सोन्याची बिस्किटे चोरणाऱ्या टोळीचा नागपूर पोलिसांनी पर्दाफाश केला आहे. सूर्यवंशी रिफायनरी या नामांकित ठिकाणाहून झालेल्या सोनं चोरीच्या प्रकरणात पोलिसांनी दोघा आरोपींना अटक केली असून त्यांच्याकडून तब्बल ५५ ग्रॅम सोन्याची बिस्किटे जप्त करण्यात आली आहेत.
अटक आरोपींची नावे – वैभव मालगावे आणि जगन्नाथ जावीर अशी असून हे दोघेही टोळीतील सक्रिय सदस्य आहेत. विशेष बाब म्हणजे, या दोघांनी रिफायनरीत नोकरी मिळवण्यासाठी बनावट ओळख वापरली होती. त्यांनी रिफायनरीच्या मालकाला “गावचा असल्याचे” सांगून विश्वास संपादन केला आणि तेथे काम मिळवले.
कामगार म्हणून काम करत असतानाच त्यांनी दुकानाच्या अंतर्गत कामकाजाचा अभ्यास केला आणि योग्य संधी मिळताच सोन्याच्या बिस्किटांवर डल्ला मारला. चोरी केल्यानंतर हे दोघे पसार झाले होते. मात्र, पोलीस दलाच्या गुन्हे शाखेने तात्काळ तपास सुरू करून दोघांना अटक केली.
टोळीतील मुख्य दोन आरोपी अजूनही फरार असून, त्यांचा शोध घेण्यासाठी पोलीस पथके पाठवण्यात आली आहेत. हे आरोपी चोरी केलेले सोनं इतरत्र विकण्याच्या तयारीत असल्याची माहिती देखील पोलिसांनी दिली आहे.
सध्या पोलिसांकडून या प्रकरणाचा अधिक तपास सुरू आहे. चोरीतील उर्वरित सोनं, आरोपींच्या संपर्कातील इतर व्यक्ती आणि गुन्ह्यात वापरलेली साधने यांचा शोध घेतला जात आहे.
पोलिसांनी नागपूरमधील सराफ व्यापाऱ्यांना सावध राहण्याचे आवाहन केले असून, ओळखीच्या आधारावर कोणत्याही व्यक्तीला कामावर ठेवण्याआधी त्यांच्या पार्श्वभूमीची खातरजमा करण्यास सांगितले आहे.
तपास पुढे जात असताना या टोळीचे आणखी धक्कादायक गुन्हे उघडकीस येण्याची शक्यता पोलिसांनी व्यक्त केली आहे.
