एकदिवसीय परिषदेला व्यावसायिक व उद्योजकांचा उत्तुंग प्रतिसाद

0

– रौप्य महोत्सवी वर्षानिमित्त सॅटर्डे क्लब ग्लोबल ट्रस्ट चा यशस्वी उपक्रम

नागपूर (Nagpur) , १२ जानेवारी: शनिवारी सॅटर्डे क्लब ग्लोबल ट्रस्ट (SCGT) च्या रौप्य महोत्सवी वर्षानिमित्त आयोजित “बिझनेस बियॉंड बांऊडरीज” हा व्यापारी परिषदेचा कार्यक्रम दिमाखात पार पडला. हा विशेष कार्यक्रम उद्योजकता, व्यवसायातील नावीन्य आणि औद्योगिक कौशल्यांच्या प्रचारासाठी महत्त्वाचा ठरला.

कार्यक्रमाची सुरुवात सकाळी ९ वाजता नेटवर्किंग चहापान आणि नोंदणी सत्राने झाली. त्यानंतर सॅटर्डे क्लब ग्लोबल ट्रस्टचे अध्यक्ष अशोक दुगाडे, व्यवस्थापकीय संचालक अजित मराठे, रवींद्र प्रभुदेसाई, महासचिव सुहास फडणीस, उप-महासचिव सुभाष गोरे तसेच नागपूर चॅप्टरचे अध्यक्ष बागेश महाजन व अन्य पदाधिकारी यांच्या उपस्थितीत परिषदेचे औपचारिक उद्घाटन संपन्न झाले. यावेळी उपस्थितांना सॅटर्डे क्लबचे संस्थापक स्वर्गीय माधवराव जी भिडे यांच्या प्रेरणादायी कार्याची ओळख करून देण्यात आली. त्यांच्या जीवनप्रवासावर आधारित तेजोनिधी या उपेंद्र साळवी लिखित पुस्तकाचे अनावरण करण्यात आले. तसेच यावेळी सॅटर्डे क्लबच्या पुस्तिकेचे तसेच नागपूर चॅप्टरच्या पुस्तिकेचे प्रकाशन देखील मान्यवरांच्या हस्ते करण्यात आले.

कार्यक्रमात विविध क्षेत्रातील मान्यवरांनी मार्गदर्शन केले. यामध्ये खालील सत्रांचा समावेश होता.

“Building Sustainable and Scalable Businesses” – स्थिर व शाश्वत व्यवसाय निर्माण करण्यावर मुंबई येथील प्रसिद्ध बिझनेस कोच कुंदन गुरव यांनी आपल्या सत्रातून उपस्थित व्यावसायिकांशी मनोरंजक पद्धतीने संवाद साधून मार्गदर्शन केले.

कार्बन क्रेडिटची निर्मिती आणि व्यवसाय कार्यशाळेमध्ये रुपेश पाटील लडे (चेयरमन, सातपुडा नॅचरल शेतकरी उत्पादक कं. अकोला अध्यक्ष एग्रीकल्चर इंजिनिअर्स सो. फॉर ट्रायबल डेव्हलपमेंट) यांनी नाविन्यपूर्ण मुद्यांनी मार्गदर्शन केले.

MSME Lean Manufacturing Tools – लीन मॅन्युफॅक्चरिंग साधनांची ओळख आणि लहान व मध्यम उद्योगांसाठी त्याचे महत्त्व मनीष खैरकर यांनी सादरीकरणाद्वारे पटवून देत विविध पैलूंवर प्रकाश टाकला.

केंद्रीय भृपृष्ठ परिवहन मंत्री श्री. नितीन गडकरी, यांनी आपल्या व्हिडिओ संदेशाद्वारे सॅटर्डे क्लबच्या कार्यप्रणालीचे कौतुक करीत मराठी व्यावसायिक व उद्योजक यांच्या उत्थानात मोठे योगदान आहे असे सांगत रौप्यमहोत्सवी वर्षानिमित्त आयोजित व्यावसायिक परिषदेच्या यशस्वितेसाठी तसेच क्लबच्या भविष्यातील वाटचालीसाठी शुभेच्छा दिल्या.

कार्यक्रमात श्री. संदीप पाटील (IPS), विशेष पोलीस महानिरीक्षक, महाराष्ट्र, तसेच यांची प्रमुख उपस्थिती होती. उद्योजक श्री. रवींद्र प्रभुदेसाई (पितांबरी प्रॉडक्ट्स), श्री. सुदर्शन शेंडे (विठोबा हेल्थकेअर) आणि श्री. राजेश रोकडे (रोकडे ज्वेलर्स), डॉ. निरुपमा देशपांडे (संपूर्ण बांबू केंद्र), शशिकांत चौधरी (सिरिअल आंतरप्रेन्युअर, एंजेल इन्हेस्टर आणि आयटी तज्ज्ञ) यांनी त्यांच्या यशस्वी उद्योजकीय वाटचालीचा प्रवास उपस्थितांसोबत शेअर केला. तसेच संवाद सूत्रधारांनी विचारलेल्या विविध प्रश्नांना समर्पक उत्तरे देत उपस्थित उद्योजक व व्यावसायिकांना यथोचित मार्गदर्शन केले. जेष्ठ संपादक श्रीपाद अपराजित यांनी सॅटर्डे क्लबचे संस्थापक कै. माधवराव भिडे यांच्या सोबतचे आपले ऋणानुबंध उलगडले तसेच सॅटर्डे क्लबची सुरुवात, आजवरचा प्रवास आणि मराठी उद्योजकांशी त्यांची बांधिलकी यावर त्यांनी उपस्थितांशी संवाद साधला.

महत्त्वाचे मुद्दे आणि चर्चेचे विषय

– व्यवसायात नावीन्य कसे आणावे?

– कार्बन क्रेडिट ट्रेडिंग आणि कृषी क्षेत्रातील संधी

– लघु आणि मध्यम उद्योगांसाठी लीन मॅन्युफॅक्चरिंग टूल्स.

उपस्थितांचा उत्स्फूर्त सहभाग

कार्यक्रमाला मोठ्या संख्येने उद्योजक, व्यावसायिक आणि नवउद्योजकांनी मोठ्या संख्येने हजेरी लावली. सहभागी उद्योजकांना नेटवर्किंग भोजन आणि चहापान सत्रांमधून एकमेकांसोबत संवाद साधण्याची संधी मिळाली.

समारोप व आभार प्रदर्शन

कार्यक्रमाचे समारोपीय मार्गदर्शन SCGT चे व्यवस्थापकीय संचालक अजित मराठे यांनी केले. त्यांनी पदाधिकारी आणि कोअर टीमच्या सदस्यांचे अभिनंदन केले आणि विविध सत्रात मार्गदर्शन करण्याऱ्या मान्यवरांच्या निवडीचेही कौतुक केले. यानंतर उपमहासचिव सुभाष गोरे यांनी उपस्थितांचे आभार व्यक्त केले.

कार्यक्रमाच्या अखेरीस सर्व कोअर टीमच्या सदस्यांचा वैयक्तिक सत्कार करण्यात आला.

या कार्यक्रमामुळे अनेक नव्या संधीविषयीचे मार्गदर्शन सहभागी व्यावसायिकांना मिळाले. कार्यक्रमाचे पहिल्या भागाचे सूत्रसंचालन नागपूर चॅप्टरच्या सदस्या श्वेता सहस्त्रभोजनी यांनी तर दुसऱ्या भागाचे संचालन अकोला चॅप्टरच्या सदस्या मोहिनी मोडक यांनी केले. कार्यक्रमाच्या यशस्वीतेसाठी अश्विनी ऋषी, शरद अरसडे, अमित बोरकर, अथर्व आसलकर, चैत्र सालनकर, प्रशांत नवघरे, आनंद देव, भुलेश्वर माटे, ऋतुजा आढाव, शशांक लाडोळे व इतर सदस्यांनी परिश्रम घेतले.