उद्योग क्षेत्राच्या शिफारसींचा समावेश केल्याबद्दल मुख्यमंत्री देवेंद्र फडणवीस यांचे आभार
नागपूर 9 मार्च :- मुख्यमंत्री व वित्तमंत्री देवेंद्र फडणवीस यांनी सादर केलेल्या उद्योगपूरक महाराष्ट्र अर्थसंकल्प २०२६–२७ चे असोसिएशन फॉर इंडस्ट्रियल डेव्हलपमेंट (एआयडी) ने स्वागत केले असून, अलीकडे नागपूर येथे आयोजित करण्यात आलेल्या अडवांटेज विदर्भ च्या तिसऱ्या आवृत्ती दरम्यान मांडण्यात आलेल्या उद्योग क्षेत्रातील अनेक महत्त्वपूर्ण शिफारसींचा या अर्थसंकल्पात समावेश केल्याबद्दल कृतज्ञता व्यक्त केली आहे.
या कार्यक्रमादरम्यान झालेल्या चर्चेचे प्रतिबिंब अर्थसंकल्पातील अनेक महत्त्वाच्या घोषणांमध्ये दिसून येते. त्या वेळी राज्य मंत्री अॅड. आशिष जयस्वाल यांनी उद्योग क्षेत्रातील प्रतिनिधींनी मांडलेल्या सूचनांचा आगामी अर्थसंकल्पात विचार केला जाईल, असे आश्वासन दिले होते.
महाराष्ट्र पर्यटन विकास महामंडळाच्या सुवर्णमहोत्सवानिमित्त राज्यातील ५० पर्यटन स्थळांवर आधुनिक सुविधा विकसित करण्यासाठी २५० कोटी रुपयांची तरतूद करण्याचा शासनाचा निर्णय एआयडी ने स्वागतार्ह असल्याचे म्हटले आहे. जागतिक दर्जाच्या पायाभूत सुविधांसह प्रमुख पर्यटन स्थळांचा विकास करण्याची एआयडी ची शिफारस यामुळे प्रत्यक्षात येणार आहे. तसेच नागपूरजवळील रामटेक येथे राज्यातील दुसऱ्या फिल्म सिटीची घोषणा करण्यात आल्याने विदर्भ हा चित्रपट चित्रीकरण आणि पर्यटनासाठी महत्त्वाचे केंद्र म्हणून विकसित होण्यास चालना मिळणार आहे.
याशिवाय, बांबू क्षेत्राच्या बळकटीकरणासाठी शासनाने घेतलेल्या पुढाकाराचेही एआयडी ने कौतुक केले आहे. बांबू क्षेत्राला कृषी मंत्रालयाच्या अखत्यारित आणणे तसेच स्वतंत्र बांबू मिशन स्थापन करण्याच्या उपक्रमांचा अडवांटेज विदर्भ च्या गोलमेज परिषदेत सविस्तर विचार करण्यात आला होता, ज्याबाबत माननीय अॅड. आशिष जयस्वाल यांनी सकारात्मक आश्वासन दिले होते.
तसेच आगामी वाढवण बंदराला मुंबई–नागपूर द्रुतगती मार्ग (समृद्धी महामार्ग) यांच्याशी जोडणाऱ्या १०४.८९ किमी लांबीच्या हाय-स्पीड ग्रीनफिल्ड मालवाहतूक कॉरिडॉरची घोषणा एआयडी ने स्वागतार्ह ठरवली आहे. यामुळे विदर्भातील लॉजिस्टिक्स कार्यक्षमता वाढून औद्योगिक विकासाला मोठी चालना मिळेल.
एआयडी चे अध्यक्ष आशिष काळे म्हणाले, “अडवांटेज विदर्भ मध्ये मांडण्यात आलेल्या महत्त्वाच्या शिफारसींचा राज्याच्या अर्थसंकल्पात समावेश करून एआयडी च्या उपक्रमांना सातत्याने पाठिंबा दिल्याबद्दल आम्ही महाराष्ट्राचे माननीय मुख्यमंत्री देवेंद्र फडणवीस आणि माननीय राज्य मंत्री आशिष जयस्वाल यांचे मनःपूर्वक आभार मानतो. यामुळे विदर्भाच्या औद्योगिक विकासाला गती देण्यासाठी शासनाची कटिबद्धता स्पष्ट होते.”
एआयडी च्या मते, महाराष्ट्र अर्थसंकल्प २०२६–२७ हा राज्यातील पायाभूत सुविधा बळकट करण्यासाठी, क्षेत्रनिहाय विकासाला चालना देण्यासाठी आणि औद्योगिक प्रगतीला वेग देण्यासाठी एक प्रगत आणि सकारात्मक पाऊल आहे.
