सुरक्षित होळी, निर्भेळ आनंद: वीज सुरक्षा पाळण्याचे महावितरणचे आवाहन

नागपूर(Nagpur), दि. 25 फेब्रुवारी 2026: आनंद, उत्साह आणि रंगांची उधळण घेऊन येणारा होळी व रंगपंचमीचा सण आता अवघ्या काही दिवसांवर येऊन ठेपला आहे. संपूर्ण महाराष्ट्रात हा उत्सव मोठ्या जल्लोषात साजरा केला जातो. मात्र, या उत्सवाच्या आनंदात कळत-नकळत होणाऱ्या मानवी चुकांमुळे सणाचे रूपांतर भीषण दुर्घटनेत होऊ शकते. हीच शक्यता लक्षात घेऊन महावितरणच्या नागपूर परिमंडलाने नागरिकांना ‘सुरक्षित होळी’ साजरी करण्याचे विशेष आवाहन केले आहे.

होळी पेटवताना घ्यावयाची दक्षता: गल्लीबोळांत किंवा रस्त्यावर होळी पेटवताना वरून कोणत्याही उच्च दाबाच्या वीजवाहिन्या (Overhead Lines) जात नाहीत ना, याची खात्री आयोजकांनी करून घ्यावी. होळीच्या ज्वाळांची झळ थेट तारांना लागल्यास त्या वितळून तुटू शकतात, ज्यामुळे जीवितहानीचा मोठा धोका निर्माण होतो. तसेच, शहरात अनेक ठिकाणी भूमिगत (Underground) वीज केबल्स असतात; होळीच्या अतिउष्णतेमुळे जमिनीखालील या केबल्स खराब होऊन संपूर्ण परिसराचा वीजपुरवठा खंडित होऊ शकतो. त्यामुळे होळी नेहमी मोकळ्या जागेत आणि वीज यंत्रणेपासून सुरक्षित अंतरावरच पेटवावी.

रंगपंचमी आणि जलसुरक्षा: रंगपंचमीच्या दिवशी पाण्याचे फवारे उडवणे किंवा रंगाचे फुगे फेकणे सामान्य असले, तरी हे फवारे चुकूनही ट्रान्सफॉर्मर (रोहित्र) किंवा वीज खांबांच्या दिशेने जाणार नाहीत, याची दक्षता घ्यावी. ओल्या हातांनी घराच्या बाहेरील किंवा आतील विजेच्या बटनांना स्पर्श करू नका. रंग खेळताना अनेकदा शरीर ओले असल्याने विजेच्या खांबांना टेकून उभे राहिल्याने ‘अर्थिंग’मुळे शॉक लागण्याची दाट शक्यता असते. घराबाहेर रंग खेळताना पाण्याचा साठा विजेच्या खांबाभोवती किंवा डीपी (DP) जवळ साचणार नाही, याची काळजी घ्यावी. घरातही वीज मीटर, प्लग आणि उपकरणांचा पाण्यापासून बचाव करावा.

वाहतूक आणि हुल्लडबाजीवर नियंत्रण: उत्सवाच्या काळात होणारी बेधुंद वाहन चालवण्याची वृत्ती आणि हुल्लडबाजी अनेकदा फिडर पिलर किंवा खांबांना धडक देऊन वीज यंत्रणेचे नुकसान करते. ट्रकमधून होळी किंवा झाडे आणताना ती रस्त्यावरील वीज तारांना स्पर्श करणार नाहीत, याची उत्सवप्रेमींनी विशेष काळजी घ्यावी. तसेच, सार्वजनिक कार्यक्रमाच्या ठिकाणी वीज उपकरणांची तज्ज्ञांकडून पूर्वतपासणी करून घेणे आयोजकांसाठी बंधनकारक आहे.

तात्काळ मदतीसाठी संपर्क साधा: कोणतीही अनुचित घटना घडल्यास किंवा वीजपुरवठा खंडित झाल्यास नागरिकांनी स्वतः दुरुस्तीचा धोकादायक प्रयत्न करू नये. महावितरणचे तांत्रिक कर्मचारी या काळात विशेष गस्तीवर असतील. मदतीसाठी महावितरणच्या 1912, 1822-212-3535 किंवा 1800-233-3435 या 24 तास सुरू असलेल्या टोल फ्री क्रमांकावर तात्काळ संपर्क साधावा.

“नागरिकांनी सुरक्षा नियमांचे पालन करून सहकार्य करावे आणि आपला सण सुरक्षित व प्रकाशमय करावा,” असे आवाहन महावितरणचे मुख्य अभियंता दिलीप दोडके यांनी केले आहे.

उपमुख्य जनसंपर्क अधिकारी,
महावितरण, नागपूर