नागपूर (Nagpur) :- विदर्भाच्या शैक्षणिक आणि राजकीय क्षेत्रातील एक आधारस्तंभ, ज्येष्ठ समाजसेवक आणि माजी खासदार दत्ताजी मेघे (८९) यांचे निधन झाले. त्यांच्या निधनामुळे महाराष्ट्राच्या सार्वजनिक जीवनात मोठी पोकळी निर्माण झाली असून, सर्वत्र हळहळ व्यक्त केली जात आहे.
राजकीय प्रवास आणि जनसंपर्क
११ नोव्हेंबर १९३६ रोजी जन्मलेल्या दत्ताजी मेघे यांनी महाराष्ट्राच्या राजकारणात आपल्या कार्याचा मोठा ठसा उमटवला. त्यांनी तीन वेळा लोकसभा खासदार म्हणून जनतेचे प्रतिनिधित्व केले. काँग्रेस, राष्ट्रवादी काँग्रेस आणि नंतर भारतीय जनता पक्ष अशा विविध टप्प्यांवर त्यांनी राजकारण केले, मात्र पक्षापलीकडे जाऊन सर्वच राजकीय नेत्यांशी त्यांचे स्नेहाचे संबंध होते.
दत्ताजी मेघे यांची खरी ओळख ‘शिक्षण महर्षी’ म्हणून होती. त्यांनी नागपूर आणि वर्धा परिसरात शिक्षणाचे मोठे जाळे निर्माण केले.
दत्ता मेघे इन्स्टिट्यूट ऑफ मेडिकल सायन्सेस या संस्थेच्या माध्यमातून त्यांनी वैद्यकीय शिक्षणाची दारे ग्रामीण भागातील विद्यार्थ्यांसाठी खुली केली. त्यांच्या शैक्षणिक संस्थांमधून हजारो डॉक्टर, इंजिनिअर्स आणि तरुण पदवीधर बाहेर पडले, जे आज जगभरात कार्यरत आहेत. वैद्यकीय सेवेसोबतच त्यांनी समाजसेवेचा वारसा आयुष्यभर जपला.
दत्ताजी मेघे यांच्या निधनाचे वृत्त समजताच राजकीय, सामाजिक आणि शैक्षणिक क्षेत्रातील मान्यवरांनी शोक व्यक्त केला आहे. “विदर्भाच्या विकासाचा एक धगधगता विचार आज शांत झाला,” अशा भावना त्यांच्या अनुयायांनी व्यक्त केल्या आहेत. त्यांच्या पश्चात त्यांचा मोठा परिवार, स्नेही आणि हजारो विद्यार्थी असा मोठा आप्तपरिवार आहे.
