नवी दिल्ली(New Delhi), 09 मे टाटा समूहाच्या एअर इंडिया एक्सप्रेसने गुरुवारी केबिन क्रूच्या कमतरतेमुळे 74 उड्डाणे रद्द केली. रजेवर गेलेल्या 200 हून अधिक केबिन क्रू मेंबर्सपैकी 30 जणांना एअरलाइनने बडतर्फ केले आहे. यासोबतच उर्वरित कर्मचाऱ्यांना तत्काळ कामावर रुजू होण्याचे आवाहन करण्यात आले आहे. तसे न केल्यास सर्वांना हाकलून देण्याचा अल्टिमेटम दिला आहे.
यासंदर्भात एअर इंडियामधील सूत्रांनी दिलेल्या माहितीनुसार, एअर इंडिया एक्स्प्रेस एअरलाइनने 30 वरिष्ठ केबिन क्रू मेंबर्सना नोकरीवरून काढून टाकले आहे. एअरलाइनचे मुख्य कार्यकारी अधिकारी (सीईओ) आलोक सिंह यांनी सांगितले की येत्या काही दिवसांत अनेक उड्डाणे रद्द करावी लागतील, तर कंपनी आपल्या इतर उड्डाणे देखील कमी करेल. दुसरीकडे, कंपनीने बडतर्फ कर्मचाऱ्यांना पाठवलेल्या टर्मिनेशन लेटरमध्ये म्हटले आहे की, तुमची कृती, फ्लाइट न चालवणे आणि कंपनीची सेवा खंडित करणे हे देखील कायद्याचे उल्लंघन आहे, जे एअर इंडियाच्या नियमांचेही उल्लंघन आहे. नोकरीवरून बडतर्फ केलेले हे केबिन क्रू मेंबर्स 7 मेच्या रात्री अचानक सामूहिक रजेवर गेले, त्यामुळे एअरलाइन्सला मंगळवारी रात्री ते बुधवारपर्यंत 100 हून अधिक उड्डाणे रद्द करावी लागली. आजही 74 उड्डाणे रद्द करण्यात आली आहेत.
कंपनीने एका निवेदनात म्हटले आहे की, अभूतपूर्व उड्डाण विलंब आणि रद्द झाल्यामुळे झालेल्या गैरसोयीबद्दल आम्ही मनापासून दिलगीर आहोत. आम्ही गैरसोय कमी करण्यासाठी कठोर परिश्रम करत आहोत, कृपया विमानतळाकडे जाण्यापूर्वी तुमची फ्लाइट स्थिती तपासा. तुमच्या फ्लाइटवर परिणाम झाला असल्यास, कृपया परतावा आणि रीशेड्युलिंग सहाय्यासाठी व्हॉटसऍप्प किंवा http://airindiaexpress.com/support वर टीआयएशी संपर्क साधता येईल.
एअर इंडिया एक्स्प्रेसच्या मोठ्या संख्येने क्रू मेंबर्स आजारपणाचे कारण देत रजेवर गेल्यामुळे एअरलाइनला 100 हून अधिक देशांतर्गत आणि आंतरराष्ट्रीय उड्डाणे रद्द करावी लागली. खरं तर, टाटा समूहाच्या नेतृत्वाखालील एअर इंडिया एक्सप्रेस एआयएक्स कनेक्ट (पूर्वीचे एअरएशिया इंडिया) स्वतःमध्ये विलीन करण्याच्या प्रक्रियेत आहे. या विमान कंपनीचे क्रू मेंबर्स काही दिवसांपासून संतापले होते.
