(Nagpur)नागपूर– गेल्या काही दिवसांपासून शांततेत सूरू असलेले गोंड गोवारी समाजाच्या तरुणांचे उपोषण आंदोलन आता आक्रमक झाले आहे. सोमवारी दुपारपासून हजारो गोंड गोवारी समाजबांधव या आंदोलनाच्या समर्थनात नागपुरात एकवटल्याने संविधान चौक हा अतिशय वर्दळीचा रस्ता सुमारे चार तास रस्ता रोको आंदोलनामुळे बंद आहे. सायंकाळ झाल्यानंतर आंदोलकांनी थेट व्हेरायटी चौक ठिय्या आंदोलनाने अडवल्याने पोलीस,प्रशासनाची तारांबळ उडाली.
संविधान चौकात आज दुपारपासून मोठ्या संख्येने गोंड गोवारी समाज आपल्या आरक्षणाच्या मागणीसाठी आंदोलन करत आहेत. मात्र, अचानक आक्रमक आंदोलकांनी मुख्य रस्त्यावर येऊन रस्ता जाम केला.आरबीआय चौक ते झिरो माईल पर्यंत आंदोलकांची गर्दी असल्याने सीताबर्डी परिसरात वाहतुकीची मोठी कोंडी निर्माण झाली आहे. गोवारी हत्याकांडाच्या पार्श्वभूमीवर पोलिसांकडून आंदोलकांना बाजूला करण्याचा प्रयत्न केला जात आहे. मात्र, नारे लावत आंदोलक रस्त्यावर बसून आंदोलन करण्यावर ठाम असल्याने पोलिसांचा नाईलाज दिसला.
