मुंबई MUMBAI : राष्ट्रवादी आमदार अपात्रतेसंदर्भात (NCP MLA Disqualification Case) विधानसभा अध्यक्ष राहुल नार्वेकर यांनी सुनावणीचे नियोजन केले असले तरी ते आणखी सात दिवसांची मुदत वाढवून घेतील, अशी माहिती पुढे येत आहे. सर्वोच्च न्यायालयाने निर्णयासाठी नार्वेकरांना ३१ जानेवारीपर्यंतची मुदत दिली आहे. मात्र, राष्ट्रवादी काँग्रेसची सुनावणी शिवसेनेपेक्षा वेगळी असल्याने अधिक वेळ लागणार असल्याचे नार्वेकर यांनी म्हटल्याचे सूत्रांनी सांगितले.
अध्यक्षांसमोर कालच्या बंदद्वार सुनावणीत याचिका एकत्रित करण्याचा निर्णय घेण्यात आल्या आहेत. एकूण पाच याचिका दोन गटांत एकत्रित करण्याचा निर्णय घेण्यात आला आहे. २६ जानेवारीपर्यंत सुनावणी पूर्ण करण्याचे नियोजन आहे. उद्या गुरुवारी होणाऱ्या पुढील सुनावणीत साक्षीदार निश्चित केले जाणार असल्याची माहिती आहे. मात्र, या घडामोडींमध्ये नार्वेकर सुनावणीसाठी अधिकचा वेळ मागणार असल्याची माहिती आहे. राष्ट्रवादी आमदार अपात्रतेसंदर्भात शेड्युल 10 चा सेक्शन 2 (A) अंतर्गत राष्ट्रवादीची सुनावणी घेण्यात येणार आहे. 2 A अंतर्गत अजित पवार गटावर स्वतःहून राजकीय पक्ष सोडल्याने त्यांना अपात्र करावं अशी शरद पवार गटाची मागणी आहे.
दरम्यान, राष्ट्रवादी काँग्रेस पक्ष आणि चिन्हाची लढाई ही सध्या निवडणूक आयोगात सुरु आहे. त्यामुळे पक्ष आणि चिन्हाचा निकाल हा आयोगात देखील प्रलंबित आहे. पण, तो निकाल कोणत्याही क्षणी येण्याची शक्यता असल्याचे सांगण्यात येत आहे. त्यामुळे राष्ट्रवादीच्या दोन्ही गटाची धाकधुक सध्या वाढलेली आहे.
