पंतप्रधान मोदी असं का म्हणाले?
अयोध्या AYODYA – “रामलल्ला अयोध्येत परतले आहेत. प्रभू श्रीराम आता तंबूत राहणार नाहीत. हे वातावरण, हा क्षण आपल्यासाठी प्रभू रामाचा आशीर्वाद आहे. २२ जानेवारी २०२४ ही कॅलेंडरवर लिहिलेली तारीख नाही. ही नव्या कालचक्राची सुरुवात आहे.आज मी प्रभू रामाची माफीही मागतो आहे. आमचा पुरुषार्थ, त्याग आणि तपस्येत काहीतरी कमतरता राहिली असेल. त्यामुळेच आपण इतकी युगे हे करु शकलो नाही. आज ती कमतरता आपण भरुन काढली आहे. मला विश्वास आहे की प्रभू राम आज आपल्याला माफ करतील”, असे प्रतिपादन पंतप्रधान नरेंद्र मोदी यांनी अयोध्येत श्रीराम मंदिर प्रतिष्ठापना सोहळ्यानंतर संबोधित करताना केले. ‘सियावर रामचंद्र की जय’ म्हणत पंतप्रधान मोदींनी राम मंदिर संकुलातील भाषणाची सुरुवात केली. राम ही भारताची प्रतिष्ठा आणि विश्वास असल्याचं पंतप्रधान नरेंद्र मोदी यांनी व्यक्त केला.
पंतप्रधान मोदी म्हणआले, आपल्या अनेक पिढ्यांनी जे धैर्य दाखवले, त्या धैर्याचा वारसा आज आपल्याला मिळाला आहे. गुलामीची मानसिकता तोडून आपण नवराष्ट्र निर्मिती करतो आहोत. अशाच प्रकारे नवा इतिहास लिहिला जातो. ही वेळ सामान्य नाही. कालचक्रावर केलेली स्मृतीची अमिट स्मृती आहे. आपल्याला सगळ्यांनाच ठाऊक आहे की रामाचे काम जिथे असते, तिथे पवनपुत्र हनुमानही विराजमान असतात. मी आज रामभक्त आणि हनुमानगढीलाही प्रणाम करतो, असे मोदी म्हणाले.
मोदी यांच्या भाषणातील हे ठळक अंश-
-शतकानुशतकांच्या प्रतीक्षेनंतर आमच्या रामाचे आगमन झाले आहे. शतकानुशतके प्रतीक्षा, त्याग, तपश्चर्या, त्यागानंतर आपला प्रभू राम आला आहे. आता आमचा रामलला मंडपात राहणार नाही, तो या दिव्य मंदिरात राहणार आहे.
-राम मंदिर बांधले तर देशभर आग लागेल, असे काही लोक म्हणायचे. असे म्हणणारे लोक परिपक्व भारतीय समाजामध्ये बसत नाहीत. राम आग नव्हे तर उर्जा आहे. राम भारताची प्रतिष्ठा आहे, राम मित्रता आहे, विश्व आहे.
-हे केवळ मंदिर नाही तर ती भारताची ओळख आहे. राम ही भारताची श्रद्धा आहे. राम ही भारताची कल्पना आहे. राम म्हणजे भारताची चेतना, विचार, प्रकाश, प्रभाव, राम सर्वव्यापी, जग, वैश्विक आत्मा आहे.
-अयोध्या आणि संपूर्ण देश आनंदाने भरून गेला. प्रदीर्घ वियोगामुळे झालेला त्रास संपला. राम वनवासी गेलेला तो कालावधी केवळ १४ वर्षांचा होता, तरीही तो इतका असह्य होता. या युगात अयोध्या आणि देशवासीयांनी शेकडो वर्षे रामाचा वियोग सहन केला आहे. आपल्या अनेक पिढ्यांनी वियोग सहन केला आहे.
-राज्यघटना अस्तित्वात आल्यानंतरही भगवान श्रीरामाच्या अस्तित्वावरून अनेक दशके कायदेशीर लढाई सुरूच होती. न्यायाची प्रतिष्ठा जपणाऱ्या भारतीय न्यायव्यवस्थेबद्दल मी कृतज्ञता व्यक्त करू इच्छितो. न्यायाला समानार्थी असलेले प्रभू रामाचे मंदिरही न्याय्य पद्धतीने बांधले गेले.
