नागपूर (Nagpur) १० मे २०२६ :- “वारसा व्यवसायात परंपरा जपत बदल स्वीकारणे हेच अत्यंत महत्वाचे असते,” असे प्रतिपादन वाघमारे फूड प्रॉडक्ट्स प्रायव्हेट लिमिटेडचे मुख्य कार्यकारी अधिकारी सारंग वाघमारे यांनी केले. विदर्भ मॅनेजमेंट असोसिएशन तर्फे आयोजित “कॅरींग अहेड अ लेगसी ब्रँड” या विषयावरील सत्रात ते बोलत होते. या सत्राचे सूत्रसंचालन डॉ. रश्मि बंसल यांनी केले, तर पंकज रडके यांनी सत्र प्रमुख म्हणून जबाबदारी सांभाळली.
वाघमारे म्हणाले की, वारसा व्यवसायात पुढील पिढीने प्रवेश करताना मोठी जबाबदारी स्वीकारावी लागते. कोणतेही बदल किंवा सुधारणा करण्यापूर्वी विद्यमान कार्यपद्धती आणि प्रणाली समजून घेणे आवश्यक आहे. तरुण उद्योजकांनी सुरुवातीला एखाद्या विभागाची जबाबदारी घेऊन त्याचे सखोल ज्ञान मिळवावे आणि त्यानंतर टप्प्याटप्प्याने बाजारपेठेच्या गरजेनुसार बदल व नवकल्पना राबवाव्यात, असा सल्लाही त्यांनी दिला.
स्वतःच्या संस्थेचे उदाहरण देताना त्यांनी सांगितले की, पूर्वी विक्रीची नोंद मासिक स्वरूपात केली जात होती. ती नंतर दररोज करण्यास सुरुवात केल्याने कामकाजात अधिक स्पष्टता आणि कार्यक्षमता आली. तसेच, एकाच वजन काट्याऐवजी १५ नवीन मशीन बसविल्यामुळे कामाचा वेग आणि अचूकता दोन्ही वाढली.
कौटुंबिक व्यवसायातील आव्हानांबाबत बोलताना त्यांनी सांगितले की, निर्णय प्रक्रियेत अधिक सहभागाची अपेक्षा असलेल्या नव्या पिढी आणि सावध भूमिका घेणारी जुनी पिढी यांच्यात मतभेद निर्माण होण्याची शक्यता असते. त्यामुळे दोन्ही पिढ्यांमध्ये संवाद, विश्वास आणि जबाबदाऱ्यांची स्पष्टता आवश्यक असल्याचे त्यांनी नमूद केले.
व्यवसायाच्या उत्तराधिकार नियोजनाचे महत्त्व अधोरेखित करताना त्यांनी भूमिका आणि जबाबदाऱ्या वेळेवर निश्चित करण्याची गरज व्यक्त केली. बदलत्या काळानुसार व्यवसाय विकसित होणे जितके महत्त्वाचे आहे, तितकेच परंपरांचा सन्मान राखणेही आवश्यक असल्याचे त्यांनी सांगितले.
कार्यक्रमाच्या प्रारंभी संस्थेचे सचिव हेमंत झुंजुरकर यांनी सदस्यांना व्हीएमएच्या संकेतस्थळावरील नोंदणी प्रक्रिया आणि नव्या सुविधांची माहिती दिली. शेवटी, अनुभवी कर्मचाऱ्यांचे ज्ञान आणि नव्या पिढीची आधुनिक दृष्टी यांचा समतोल साधणारे व्यवसायच यशस्वी ठरतात, असे वाघमारे यांनी नमूद केले.
